Skólastjórnendum Hagaskóla hafa borist nýjar upplýsingar, þar á meðal myndir, vegna atviks sem nemendur í áttunda bekk urðu vitni að á þriðjudag. Í nýju bréfi til foreldra áréttar Sigríður Nanna Heimisdóttir skólastjóri að skólinn líti málið alvarlegum augum. Nemendum sem sáu atvikið stendur til boða að ræða það við skólann.
„Skólinn harmar að þetta atvik hafi átt sér stað og mun vinna að úrlausn þessa viðkvæma máls samkvæmt verkferlum. Eðli málsins samkvæmt verður ekki farið ofan í málsatvik heldur verður málið unnið áfram með hlutaðeigandi og mannauðsþjónustu skóla- og frístundasviðs. Boðið verður upp á samtal fyrir þau börn sem urðu vitni að atvikinu ef þau eða foreldrar þeirra telja þörf á og geta þau þá haft samband við mig,“ segir í bréfinu.
Í fyrri tilkynningu til foreldra sagði skólastjórinn að tveir starfsmenn skólans hefðu talið sig vera í einrúmi en sést kyssast í gegnum sandblásið gler. Sú tilkynning var send eftir að fjölmiðlar spurðust fyrir um málið.
Samkvæmt heimildum Mannlífs voru nemendurnir í enskutíma þegar þeir sáu starfsmennina hafa samfarir í skrifstofurými. Hvorugt þeirra sinnir kennslu við skólann, samkvæmt upplýsingum Mannlífs. Skólastjórinn hefur ekki staðfest þá lýsingu á atvikinu og kvaðst í svari við fyrirspurn ekki ætla að tjá sig frekar um málið við fjölmiðla.
Á mynd sem Mannlíf hefur undir höndum sjást útlínur tveggja einstaklinga í gegnum rúðu sem er að mestu sandblásin. Í gegnum glæran neðri hluta rúðunnar sést svartur sófi. Karlmaður virðist sitja eða liggja í sófanum og kona er upprétt ofan á honum.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
































Athugasemdir