Diljá Mist Einarsdóttir, þingmaður Sjálfstæðisflokksins, hrósaði samstarfsfólki sínu á Alþingi í dag fyrir þá hlýju sem þingmenn sýna hver öðrum þegar sorg eða áföll ber að garði en hún ræddi þetta undir liðnum „Störf þingsins“. Hún sagði landsmenn sjá pólitískan ágreining í þingsal en fæstir fengju að sjá hvernig þingmenn styddu hver annan þvert á flokka.
„En fæstir sjá hlýhuginn milli góðra kollega, þvert á flokka. Faðmlögin á göngunum, hvatninguna, uppbyggilegu samtölin, kærleika sem er mjög áþreifanlegur þegar fólk gengur hér í gegnum erfiðleika.“
Diljá hafði í upphafi ræðu sinnar vikið að versnandi hagvaxtarhorfum og sagðist geta varið ræðutíma sínum í að gagnrýna ríkisstjórnina fyrir aukin útgjöld. Að þessu sinni vildi hún þó tala um Alþingi sem vinnustað og fólkið sem þar starfar.
Hún sagði traust til Alþingis og stjórnmálamanna ítrekað mælast of lítið og taldi að landsmenn ættu auðveldara með að setja sig í spor þingmanna ef þeir fengju að kynnast þessari hlið þingstarfsins.
„Hér vinnur gott fólk með mismunandi hugsjónir að leiðarljósi en ásetningur allra er góður. Og þegar við, eins og allt annað fólk, göngum í gegnum erfiðleika skiptir máli að vinna á góðum vinnustað og eiga stuðning vísan hjá samstarfsfólki.“
„Alþingi er slíkur vinnustaður,“ sagði Diljá að lokum. Þá heyrðist úr þingsalnum: „Heyr, heyr.“
Veistu meira? Láttu okkur vita
Það tókst ekki að sækja formið. Reyndu aftur eftir augnablik.



























Athugasemdir