Kristinn Hrafnsson, ritstjóri Wikileaks, tekur undir harða gagnrýni Vilhjálms H. Vilhjálmssonar hæstaréttarlögmanns á boðaðar lagabreytingar dómsmálaráðherra sem fela í sér auknar heimildir lögreglu. Kristinn segir breytingarnar vera ríkisstjórninni til háborinnar skammar og telur að þeir sem vonuðust eftir aukinni skynsemi í réttindamálum borgaranna séu nú að verða fyrir miklum vonbrigðum.
Kristinn vísar í Facebook-færslu sinni til pistils Vilhjálms á Vísi og segir lagabreytingarnar ekkert annað en „hrollvekju“.
„Það er rétt sem lögmaðurinn setur hér fram. Þessi lagabreyting er ekkert annað en hrollvekja. Þetta er ríkisstjórninni til háborinnar skammar,“ skrifar Kristinn.
Kristinn segir að þeir sem væntingar hafi haft um að ný ríkisstjórn myndi færa réttindi borgaranna í skynsamlegri átt séu nú að verða fyrir miklum vonbrigðum. Hann telur að ekkert standi lengur í vegi fyrir því að yfirstjórn lögreglu geti farið í ráðuneyti lögreglumála og óskað eftir auknum valdheimildum.
„Það er engin hindrun lengur þegar yfirstjórn lögreglu labbar inn í ráðuneyti lögreglumála og pantar auknar valdheimildir eins og frekur krakki í dótabúð,“ skrifar hann.
Kristinn segir að á sama tíma hafi komið fram fjölmörg dæmi um að lögreglu sé alls ekki treystandi fyrir auknum heimildum. Þrátt fyrir það telur hann að lítil viðspyrna verði gegn þessari stefnu á Alþingi.
Pistill Vilhjálms H. Vilhjálmssonar, sem Kristinn vísar til, fjallar um boðaðar breytingar á lögum um heimildir lögreglu og þær hættur sem hann telur fylgja því að auka vald hennar. Vilhjálmur hefur áður gagnrýnt auknar rannsóknarheimildir lögreglu og varað við því að slíkar heimildir geti haft áhrif á réttindi almennings, ekki aðeins þeirra sem grunaðir eru um afbrot.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.



























Athugasemdir