Sáttasex (e. makeup sex) getur skapað sterka nánd eftir rifrildi og látið par finna fyrir tímabundinni sátt. En þótt kynlífið sé gott er ekki þar með sagt að ágreiningurinn sé úr sögunni. Þetta er umfjöllunarefni í nýrri grein á Cosmopolitan.
Þar er rætt við Molly Mindel, löggiltan hjóna- og fjölskylduráðgjafa, sem segir að kynlíf geti vissulega styrkt tengsl og hjálpað fólki að ná aftur tilfinningalegu jafnvægi. Það leysi þó ekki endilega undirliggjandi vandamál eða ágreining í sambandinu.
Samkvæmt Mindel getur kynlíf breytt tímabundið kemestríunni og tilfinningalegu ástandi fólks. Við kynlíf losna meðal annars hormónin oxýtósín og dópamín, sem geta aukið vellíðan og tilfinningu fyrir nánd. Þessi áhrif breyti hins vegar ekki sjálfkrafa óuppfylltum þörfum, grundvallarviðhorfum eða sárindum sem tengjast ágreiningnum.
Þess vegna getur par upplifað mikla nánd meðan á kynlífinu stendur en fundið aftur fyrir fjarlægð þegar því lýkur. Kynlífið geti þannig virkað eins og plástur á sár sem hefur ekki fengið viðeigandi meðhöndlun.
Tilfinningarnar geta setið eftir í marga daga
Í greininni kemur fram að það sé fullkomlega eðlilegt að finna enn fyrir reiði, sársauka eða gremju dögum eða jafnvel vikum eftir rifrildi, þótt parið hafi rætt málin og stundað sáttasex.
Mikilvægt sé að báðir aðilar upplifi að á þá sé hlustað, að þeir njóti virðingar og að tilfinningar þeirra séu teknar alvarlega. Ekki sé nauðsynlegt að öll mál séu leyst á stuttum tíma.
Stundum snúist ágreiningurinn ekki aðeins um einstakt atvik heldur stærra vandamál í sambandinu. Þá dugi ekki að ræða eitt rifrildi ef undirliggjandi mynstrið er enn til staðar.
Mindel bendir einnig á að stundum sé eitthvað ósagt eða tilfinningar hafi ekki fengið nægilegt rými í samtalinu. Það geti komið upp aftur síðar og valdið vanlíðan.
Mikilvægt að ræða málin þegar ró hefur færst yfir
Ráðgjafinn leggur til að pör snúi aftur að erfiðum samtölum þegar bæði eru róleg og tilfinningalega tilbúin til þess. Þá sé auðveldara að nálgast vandann af forvitni og vilja til skilnings í stað þess að beina sökinni hvort að öðru.
Hún segir jafnframt að stundum sé heilbrigðast að viðurkenna að ekki sé hægt að leysa allan ágreining strax og að parið þurfi að læra að sætta sig við óvissuna um stund.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.































Athugasemdir