Flutningaþjónustan ehf. hefur verið dæmd til að greiða fyrrverandi starfsmanni rúmar 1,6 milljónir króna vegna vinnuslyss sem varð þegar hann bar þungt píanó niður þröngan stigagang. Dómur féll í Héraðsdómi Reykjavíkur 12. október.
Atvikið varð 10. júní 2024 þegar starfsmaðurinn vann við búslóðaflutninga. Hann bar píanóið ásamt öðrum starfsmanni en samkvæmt framburði fyrir dómi var venjan að fjórir starfsmenn bæru píanó. Aðstæður voru hins vegar þröngar.
Við burðinn fór píanóið úr jafnvægi og starfsmaðurinn brást við til að koma í veg fyrir að það félli af flutningsbandi. Við það fékk hann hnykk á bakið. Hann hafði samband við heilsugæslu sama kvöld og lýsti miklum verkjum.
Starfsmaðurinn var í kjölfarið metinn óvinnufær og sagði síðar upp störfum þar sem hann taldi sig ekki hafa náð bata og vildi finna minna líkamlega krefjandi starf.
Flutningaþjónustan hafnaði kröfu hans um laun vegna vinnuslyss og hélt meðal annars fram að ekki hefði orðið óvæntur utanaðkomandi atburður sem félli undir skilgreiningu vinnuslyss.
Dómurinn féllst ekki á þau sjónarmið. Talið var nægilega sannað að píanóið hefði skyndilega farið úr jafnvægi og að um óvæntan atburð hefði verið að ræða.
Þá var sérstaklega bent á að Flutningaþjónustan hefði vitað af atvikinu en ekki tilkynnt slysið til Vinnueftirlitsins, þrátt fyrir lagaskyldu þar um. Fyrirtækið yrði að bera hallann af því.
Flutningaþjónustan var dæmd til að greiða manninum 1.606.975 krónur ásamt dráttarvöxtum. Þá þarf fyrirtækið að greiða 930 þúsund krónur í málskostnað.
