Lögreglan á höfuðborgarsvæðinu rannsakar tilkynningu um líkamsárás í miðborg Reykjavíkur. Þá voru tveir ökumenn stöðvaðir í póstnúmeri 105 vegna aksturs undir áhrifum ávana- og fíkniefna en þetta kemur fram í dagbók hennar frá því í gærkvöldi og í nótt.
Annar ökumannanna var próflaus og fannst lítilræði af fíkniefnum á honum. Báðir voru fluttir á lögreglustöð til frekari úrvinnslu samkvæmt dagbókinni. Þá var ökumaður stöðvaður í Laugardalnum fagra vegna gruns um ölvunarakstur. Hann mældist undir leyfilegum mörkum í öndunarprófi en var gert að hætta akstri.
Ökumaður var kærður fyrir að aka gegn rauðu ljósi í póstnúmeri 105 og annar var stöðvaður fyrir akstur án gildra ökuréttinda.
Lögreglu barst einnig tilkynning um eld í skólabyggingu sem reyndist minniháttar. Þá bárust tilkynningar um samkvæmishávaða, þar á meðal í miðborginni. Lögregla hafði jafnframt uppi á fólki sem tilkynnt hafði verið um vegna grunsamlegra mannaferða í póstnúmeri 105 og skráði upplýsingar um það.
Í dagbók lögreglu segir að nóttin hafi verið með rólegasta móti og að enginn hafi verið í fangageymslu þegar dagbókin var tekin saman.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
































Athugasemdir