Fyrrverandi prófessor við Macalester háskólanum í Minnesota í Bandaríkjunum hefur verið ákærður fyrir eignaspjöll eftir að hann er sagður hafa pissað á bakpoka nemanda. Tjónið er talið nema meira en 2.000 Bandaríkjadölum.

Paul Fischer, sem kenndi líffræði við skólann í meira en 25 ár, er ákærður fyrir eignaspjöll. Verði hann fundinn sekur á hann yfir höfði sér allt að fimm ára fangelsi og 10.000 dala sekt.

Samkvæmt ákæru skildi nemandi bakpoka sinn eftir eftirlitslausan í vísindabyggingu skólans í um sex mínútur í desember síðastliðnum. Þegar hún sneri aftur hafi hún fundið þvag á bakpokanum. Hún taldi Fischer bera ábyrgð þar sem pokinn hefði verið fyrir utan skrifstofu hans og hann verið eini maðurinn á svæðinu á umræddum tíma.

Öryggisdeild Macalester College rannsakaði málið og kom í ljós að Fischer hafði verið tengdur við sex önnur tilvik þar sem þvag fannst á háskólasvæðinu. Meðal annars hafði þvag fundist í ruslatunnum, vatnsflöskum fólks og skreytingum annarra prófessora.

Fischer viðurkenndi við yfirheyrslu lögreglu að hann hefði þróað með sér þann vana að pissa í glas og losa síðan innihaldið í ruslatunnur eða vaska á rannsóknarstofum skólans.

Bakpoki nemandans og munir sem voru inni í honum skemmdust í atvikinu.

Skólinn hefur staðfest að Fischer starfi ekki lengur við skólann.

Fischer á að mæta fyrir dóm í byrjun nóvember.