Ugla Stefanía Kristjönudóttir Jónsdóttir, starfsmaður Reykjavíkurborgar og fyrrverandi starfsmaður Mannréttindaskrifstofu borgarinnar, gagnrýnir harðlega ummæli Hildar Björnsdóttur borgarstjóra um starfsemi skrifstofunnar.
Ugla Stefanía birtir myndskeið frá RÚV þar sem Hildur segir að starfsmenn Mannréttindaskrifstofunnar hafi ekki verið að gera neitt gagn. Ugla segir mikinn mun á því að ráðast í skipulagsbreytingar og hagræðingu annars vegar og að gera lítið úr störfum starfsfólks hins vegar.
„Mér finnst eitt að fara í skipulagsbreytingar og hagræðingu, en það er eitthvað allt annað að segja að starfsfólkið þitt hafi ekki verið að gera neitt gagn. Í því felst gríðarlegt virðingarleysi,“ segir Ugla Stefanía.
Mannréttindaskrifstofa Reykjavíkurborgar var lögð niður í sumar í tengslum við umfangsmiklar skipulagsbreytingar hjá borginni. Borgarráð samþykkti breytingarnar í sumar og voru verkefni skrifstofunnar færð til annarra sviða borgarinnar.
Ugla Stefanía segir starf Mannréttindaskrifstofunnar hafa spannað 18 ár og að á þeim tíma hafi starfsfólk sinnt fjölmörgum verkefnum á sviði ofbeldisvarna, aðgengis, hinsegin mála, lýðræðis og jafnréttis. Hluti verkefnanna hafi verið lögbundinn.
„Svona ummæli finnst mér vera ósanngjörn, ófagleg og lýsa fullkomnu skilningsleysi á þeim verkefnum og starfi sem skrifstofan hefur sinnt í nær tvo áratugi,“ segir hún.
Ugla Stefanía bendir jafnframt á að fjórir af sex starfsmönnum skrifstofunnar hafi haldið áfram störfum hjá borginni og verið færðir á önnur svið, þar á meðal hún sjálf.
„Að fólk leyfi sér að tala svona um starfsfólk sitt er auðvitað fyrir neðan allar hellur. Við eigum öll skilið meiri virðingu en svo,“ segir hún og lýkur færslunni með orðunum:
„Kveðja, ein af fyrrum gagnslausu starfskröftum Mannréttindaskrifstofu.“
