Vitleysingar stefndu sér í lífshættu í Reynisfjöru á dögunum þegar þeir sátu á stuðlaberginu skammt frá sjónum og stór alda skall á þeim.

Ferðalangur sem gengur undir notendanafninu @thomaudet á TikTok birti myndskeið af atvikinu en Morgunblaðið vakti athygli á myndbandinu. Þar sést einn úr hópnum sitja fremst áður en aldan skellur á honum af fullum krafti. Hann varð rennblautur en atvikið fór betur en á horfðist.

Myndskeiðið hefur vakið athygli og hafa netverjar gagnrýnt áhættuhegðun ferðalanganna. Einn sagði Reynisfjöru vera hættulegustu fjöru Íslands en annar, sem sagðist heimamaður, varaði við því að öldur gætu skolað fólki út á haf.

Myndskeiðið hefur fengið tæplega 25 þúsund áhorf og um 1.400 læk.