Eyjólfur Ármannsson innviðaráðherra gagnrýnir umfjöllun Morgunblaðsins og Viðskiptablaðsins um meintan niðurskurð í samgöngumálum og segir stjórnvöld þvert á móti hafa stóraukið framlög til málaflokksins. Þetta kemur fram í aðsendri grein ráðherrans á Vísi.
Eyjólfur segir að stökum staðreyndum hafi verið slitið úr samhengi í umfjöllun miðlanna og að heildarmyndin hafi ekki fengið nægilegt vægi. Ráðherrann vísar þó ekki til tiltekinna greina Morgunblaðsins eða Viðskiptablaðsins og því er ekki ljóst nákvæmlega hvaða umfjöllun hann hefur í huga.
Í greininni segir Eyjólfur að þegar núverandi ríkisstjórn tók við hafi innan við 40 prósent vegakerfisins verið metin í góðu ástandi af Vegagerðinni. Uppsafnaður vandi vegna undirfjármögnunar hafi verið mikill og fjárfesting í samgönguinnviðum á Íslandi verið lítil í samanburði við önnur OECD-ríki.
Ráðherrann bendir á að fyrri ríkisstjórn hafi árið 2023 áætlað 261 milljarð króna til framkvæmda á fyrstu fimm árum samgönguáætlunar sem ekki hafi orðið að veruleika. Núverandi ríkisstjórn áætli hins vegar 361 milljarð króna til framkvæmda á fyrstu fimm árum nýsamþykktrar samgönguáætlunar.
Þá segir hann almennt viðhald vega hafa aukist úr 12 til 13 milljörðum króna á ári í 16 milljarða í fyrra og 17,5 milljarða á þessu ári.
Eyjólfur nefnir jafnframt að vetrarþjónusta hafi verið fullfjármögnuð um allt land og að fimm ára kyrrstaða í jarðgangagerð hafi verið rofin. Fljótagöng eigi að fara í framkvæmd á næsta ári og fleiri jarðgöng séu í undirbúningi.
Ráðherrann vísar einnig til stofnunar innviðafélagsins Göng og brú ohf., sem ætlað er að tryggja fjármögnun stórra samgönguframkvæmda.
„Staðreyndirnar tala sínu máli,“ skrifar Eyjólfur og segir ríkisstjórnina halda áfram að auka framlög til samgöngumála þrátt fyrir aukið aðhald í ríkisfjármálum.
Athugasemdir