Kristrún Frostadóttir forsætisráðherra vill setja á fót sanngirnisbótasjóð fyrir fólk sem varð fyrir illri meðferð eða ofbeldi í vistun utan heimilis sem börn fyrir atbeina stjórnvalda. Hún kynnti frumvarp þess efnis á ríkisstjórnarfundi 3. nóvember og var það lagt fram í samráðsgátt 4. nóvember, að því er fram kemur í frétt RÚV.
Frumvarpið tekur til vistunar frá mars 1947, bæði á opinberum stofnunum og einkaheimilum. Gert er ráð fyrir þremur bótaflokkum og greiðslum að fjárhæð ein, þrjár eða fimm milljónir króna. Einnig er lögð áhersla á sálrænan stuðning, sem yrði háður faglegu mati á þörfum hvers og eins.
Sjálfstæð sjóðsstjórn myndi taka ákvarðanir á grundvelli umsókna en dagleg umsýsla yrði hjá sýslumanni. Gert er ráð fyrir að móttaka umsókna hefjist 1. janúar 2028, verði frumvarpið að lögum á þessu þingi.
Úrræðið nær ekki til vistunar fullorðinna. Ekki er heldur gert ráð fyrir að hægt verði að kæra ákvarðanir sjóðsstjórnar til æðra stjórnvalds. Hægt er að senda inn umsagnir um frumvarpið í samráðsgátt til 17. nóvember.
Athugasemdir