Sakar Tryggingastofnun um að veita rangar upplýsingar og sýna fordóma

Guð­mundur Ingi Krist­ins­son, þing­maður utan flokka og fyrr­ver­andi ráð­herra, gagn­rýndi harð­lega starf­semi heil­brigð­is­kerf­is­ins og almanna­trygg­inga­kerf­is­ins í ræðu sinni undir liðnum störf þings­ins á Alþingi í gær. Sagði hann kerfin, sem byggð hefðu verið upp á ára­tugum til að aðstoða almenn­ing, í mörgum til­fellum bregð­ast þeim sem mest þyrftu á aðstoð að halda.

Guð­mundur Ingi hóf mál sitt á að lýsa þeirri erf­iðu reynslu sem fólk hefði af sam­skiptum við opin­berar stofn­anir.

„Blóð, sviti, verkur, tár. Það er það sem ég fæ að heyra hjá fólki sem er að berj­ast við kerfið; heil­brigð­is­kerfið, almanna­trygg­inga­kerfið og önnur kerfi okkar,“ sagði Guð­mundur Ingi.

Hann nefndi meðal ann­ars dæmi um ein­stak­linga sem væru neð­ar­lega á biðlistum eftir nauð­syn­legum aðgerðum og fengju þau svör að ekki væri hægt að sinna þeim. Í stað þess að fá aðgerð væri þeim boðið upp á aukna verkja­lyfja­gjöf.

Gagnrýnir Tryggingastofnun harðlega

Þing­mað­ur­inn beindi einnig sjónum sínum að aðstæðum á hjúkr­un­ar­heim­ilum þar sem skortur væri á fag­lærðu starfs­fólki. Gagn­rýndi hann að öldruðum væru gefin geð­lyf og geð­rofslyf og dró í efa að slíkt gæti talist eðli­legt ástand.

Þá gagn­rýndi hann að konur gætu orðið fyrir fjár­hags­legum afleið­ingum innan almanna­trygg­inga­kerf­is­ins ef þær eign­uð­ust börn með stuttu milli­bili.

Sér­stak­lega gagn­rýndi Guð­mundur Ingi starfs­hætti Trygg­inga­stofn­unar rík­is­ins og sagði fólk fá rangar upp­lýs­ingar frá stofn­un­inni. Hann sak­aði jafn­framt starfs­fólk stofn­un­ar­innar um for­dóma í garð þeirra sem leit­uðu þangað eftir aðstoð.

„Það gengur ekki upp að segja við fólk: Heyrðu, þú ert ekki nógu veikur. Þú ert ekki með nóg af geð­rænum vanda­málum. Þér er ekki nógu illt í skrokknum. Þó að þú sért óvinnu­fær þá getum við ekk­ert fyrir þig gert.“

Krefst þess að stjórnvöld láti verkin tala

Guð­mundur Ingi sagði brýnt að ráð­ast í breyt­ingar á bæði heil­brigð­is­kerf­inu og almanna­trygg­inga­kerf­inu. Nauð­syn­legt væri að breyta kerf­unum innan frá svo þau þjón­uðu betur þeim ein­stak­lingum sem á þeim þyrftu að halda.

Hann minnti jafn­framt á að rík­is­stjórnin hefði nú verið við völd í tvö ár og að kom­inn væri tími til að sýna árangur í verki. Nú þyrftu stjórn­völd að sýna úr hverju þau væru gerð og ráð­ast í raun­veru­legar breyt­ingar á kerf­unum.