Melissa Pfeiffer, eldfjallafræðingur sem starfar við rannsóknir á lofthjúpnum hjá Veðurstofu Íslands, segir að hún hefði ekki uppfyllt skilyrði til að flytja til Íslands ef fyrirhugaðar reglur um innflytjendur hefðu verið í gildi þegar hún kom hingað fyrir 13 árum.
Pfeiffer segir í Facebook-færslu að hún hafi flutt til Íslands sex árum eftir að hún lauk doktorsprófi og starfi enn hjá sömu stofnun. Þar vinni hún að því að auka öryggi Íslendinga gagnvart náttúruvá.
Hún segir að sérþekking hennar hafi verið ástæða þess að hún var ráðin til starfa hér á landi. Hún sé bandarískur ríkisborgari en gift sænskum ríkisborgara og hafi fengið dvalarleyfi á grundvelli hjúskaparins.
Samkvæmt útreikningum hennar hefðu launin sem hún hafði sem vísindamaður sex árum eftir doktorspróf ekki uppfyllt kröfur fyrirhugaðra reglna.
Pfeiffer telur að með reglunum verði þröskuldurinn svo hár að hann útiloki einmitt þá einstaklinga sem Ísland ætti að vilja laða til sín, meðal annars hámenntað fólk sem leggi sitt af mörkum til samfélagsins.
„Ég hefði ekki getað flutt til þessa lands, þar sem ég hef byggt upp líf mitt og lagt mitt af mörkum til samfélagsins hvern einasta dag sem ég hef verið hér,“ skrifar hún.
Hún segir tillögurnar geta haft neikvæð áhrif á stóran hluta samfélagsins og bendir á að framlag innflytjenda sé fjölbreytt og bæti lífsgæði allra.
„Ég á betra skilið, allir innflytjendur eiga betra skilið og allir Íslendingar eiga betra skilið en þetta,“ skrifar Pfeiffer.
Hún hvetur fólk til að senda inn umsagnir um fyrirhugaðar reglur í samráðsgátt stjórnvalda.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.


























Athugasemdir