Krafði Þorgerði svara vegna kjarnorkuummæla Heimis Más

Harðar deilur urðu á Alþingi í dag vegna ummæla Heimis Más Pét­urs­sonar, fram­kvæmda­stjóra þing­flokks Flokks fólks­ins, um kjarn­orku­vopn og stríðið í Úkraínu. Þor­gerður Katrín Gunn­ars­dóttir utan­rík­is­ráð­herra sagði afstöðu íslenskra stjórn­valda til kjarn­orku­vopna skýra og benti á að Heimir Már hefði beðist afsök­unar.

Málið kom til umræðu á Alþingi þegar Stefán Vagn Stef­áns­son, þing­maður Fram­sókn­ar­flokks­ins, spurði utan­rík­is­ráð­herra út í ummæli Heimis Más.

Heimir Már hafði skrifað á sam­fé­lags­miðl­inum X og hvatt Emmanuel Macron Frakk­lands­for­seta til að senda her­menn til Úkraínu og hafa kjarn­orku­vopn til­búin. Hann hefur síðan eytt færsl­unni og beðist afsök­unar. Heimir Már sagði orða­lag sitt, og sér­stak­lega vís­un­ina til kjarn­orku­vopna, óaf­sak­an­legt.

Stefán Vagn sagði ummælin afar alvar­leg, ekki síst vegna stöðu Heimis Más innan eins rík­is­stjórn­ar­flokk­anna. Hann spurði utan­rík­is­ráð­herra hvort ummælin gætu skapað orð­spors­á­hættu fyrir Ísland og hvort málið hefði verið rætt innan rík­is­stjórn­ar­innar.

„Það er ekki hver sem er sem skrifar þetta á opin­beran vett­vang. Þetta er fram­kvæmda­stjóri stjórn­mála­flokks í rík­is­stjórn Íslands,“ sagði Stefán Vagn.

Þor­gerður Katrín sagði ummælin ekki sam­ræm­ast íslenskri utan­rík­is­stefnu. Hún lagði jafn­framt áherslu á stuðn­ing Íslands við Úkraínu og sagði afstöðu lands­ins til kjarn­orku­vopna liggja skýrt fyrir.

„Mér finnst gott að hann var fljótur að biðj­ast afsök­unar á þessu enda er stefna Íslands alveg skýr þegar kemur að kjarn­orku­vopnum,“ sagði Þor­gerður Katrín og bætti við að Ísland styddi afvopnun stór­veld­anna þegar kæmi að kjarn­orku­vopnum.

Stefán Vagn gerði athuga­semd við svarið og sagði spurn­ingu sína ekki snú­ast um stuðn­ing Íslands við Úkraínu heldur ábyrgð ein­stak­linga í áhrifa­stöðum þegar þeir tjá sig opin­ber­lega. Hann spurði hvort afsök­un­ar­beiðni Heimis Más væri nægi­leg við­brögð.

„Þetta er ekki bara eitt­hvert mál, þetta er grafal­var­legt mál,“ sagði Stefán Vagn.

Í síð­ara svari sínu ítrek­aði Þor­gerður Katrín að Heimir Már hefði beðist afsök­unar og dregið ummælin til baka. Hún beindi síðan sjónum að færslu Sergei Lavrov, utan­rík­is­ráð­herra Rúss­lands, þar sem hann gagn­rýndi sam­eig­in­legt eft­ir­lit NATO á norð­ur­slóðum. Sagði hún fyrr­ver­andi for­ráða­mann íslenskra stjórn­valda hafa end­ur­birt þá færslu og gagn­rýndi að stjórn­ar­and­staðan hefði ekki gert athuga­semdir við það.

„Við stöndum með Úkraínu, við erum ekki að hossa Rússum og mér finnst merki­legt að eng­inn úr stjórn­ar­and­stöð­unni skuli hafa áhyggjur af þessu,“ sagði Þor­gerður Katrín.