Erlendur maður hefur verið dæmdur í 30 daga skilorðsbundið fangelsi fyrir umferðarlagabrot og skjalafals eftir að hafa ekið bifreið án gildra ökuréttinda og framvísað fölsuðu ökuskírteini.
Dómur féll í Héraðsdómi Suðurlands 30. október.
Málið á rætur að rekja til 8. nóvember 2025 þegar lögregla stöðvaði manninn þar sem hann ók bifreið um Suðurlandsveg við Hveragerði. Í ljós kom að maðurinn hafði ekki gild ökuréttindi.
Þegar lögregla hafði afskipti af honum framvísaði hann moldóvsku ökuskírteini á eigin nafni. Samkvæmt ákæru var skírteinið falsað og var maðurinn talinn hafa framvísað því í blekkingarskyni.
Maðurinn mætti ekki við þingfestingu málsins þrátt fyrir að ákæra og fyrirkall hefðu verið birt honum með lögmætum hætti.
Héraðsdómur taldi sannað að maðurinn hefði gerst sekur um þá háttsemi sem honum var gefin að sök.
Hann var dæmdur í 30 daga fangelsi en fullnustu refsingarinnar frestað í tvö ár haldi hann almennt skilorð. Þá var honum gert að greiða 40 þúsund króna sekt í ríkissjóð. Greiði hann sektina ekki innan tilskilins frests skal hann sæta fjögurra daga fangelsi.
Athugasemdir