Glæsilegt og mikið endurnýjað einbýlishús á sjávarlóð á Arnarnesi er komið á sölu en um er að ræða Haukanes 6. Um er að ræða 384,5 fermetra hús á tveimur hæðum sem reist var árið 1979. Ásett verð er 340 milljónir króna.
Eignin stendur við sjávarsíðuna og úr stórum gluggum á efri hæð hússins er útsýni yfir Arnarnesvoginn. Húsið hefur verið mikið endurnýjað og garðurinn var tekinn allur í gegn sumarið 2023.
Á efri hæð hússins eru tveir inngangar. Frá aðalinngangi er komið inn í rúmgott anddyri og þaðan í stórt alrými. Setustofa er á aðra hönd og borðstofa á hina en stórir gluggar setja svip sinn á rýmið.
Eldhúsið er rúmgott og búið nýlegri Miele innréttingu og tækjum. Á hæðinni er jafnframt baðherbergi með baðkari og sturtuaðstöðu. Tvöfaldur bílskúr fylgir eigninni og er hann 43,4 fermetrar að stærð.
Neðri hæðin er ekki síður rúmgóð en þar eru sex svefnherbergi. Hjónasvítan er með sér fataherbergi en auk hennar eru fimm önnur svefnherbergi. Þar er einnig endurnýjað baðherbergi með hornbaðkari, rúmgóð geymsla og þvottahús.
Sérinngangur er á neðri hæðina auk þess sem innangengt er á milli hæða. Frá neðri hæðinni er gengið beint út á skjólgóða verönd.
Lóðin er vel gróin og samkvæmt fasteignalýsingunni afar snyrtileg. Meginhluti garðsins er fyrir framan húsið og snýr til suðurs. Þar er einnig skjólgóð verönd með skjólveggjum. Fyrir framan bílskúrinn og til hliðar við hann eru rúmgóð hellulögð bílastæði.
Eignin er 384,5 fermetrar að heildarstærð og stendur á eignarlóð við sjávarsíðuna á Arnarnesi. Ásett verð, 340 milljónir króna, jafngildir um 884 þúsund krónum á fermetra.
Athugasemdir