Wang Yi, utanríkisráðherra Kína, vill efla samstarf Kína og Íslands á sviði viðskipta, jarðhita, grænna umskipta og málefna norðurslóða. Þetta kom fram á fundi hans með Þorgerði Katrínu Gunnarsdóttur utanríkisráðherra í Peking í gær en Anadolu greinir frá.
Fundurinn fór fram í opinberri heimsókn Þorgerðar Katrínar til Kína, sem stendur yfir dagana 26. til 31. október. Á þessu ári eru 55 ár liðin frá því að Ísland og Kína tóku upp stjórnmálasamband.
Wang sagði Kína reiðubúið að deila þróunartækifærum með Íslandi og kanna frekari möguleika á samstarfi ríkjanna. Nefndi hann sérstaklega viðskipti og efnahagsmál, jarðhita, græn umskipti, málefni hafsins og norðurslóða. Þá vildi hann einnig efla samskipti ríkjanna á sviði ferðaþjónustu, sameiginlegra vísindarannsókna og menntunar.
Ráðherrarnir ræddu einnig alþjóðamál. Wang lagði fyrir sitt leyti áherslu á fjölþjóðasamstarf og hlutverk Sameinuðu þjóðanna.
„Ég átti gott samtal við kínverska utanríkisráðherrann og tvíhliða samskipti Íslands og Kína standa á traustum grunni. Við ræddum aukið samstarf á sviði orkumála og það eru ýmis tækifæri fyrir íslensk fyrirtæki og íslenskt hugvit í Kína, einkum þegar horft er til jarðvarma og grænna umskipta. Við ræddum einnig viðskipti með áherslu á fisk en langstærstur hluti útflutnings Íslands til Kína eru sjávarafurðir. Fjölbreytni vöruútflutnings fer þó vaxandi og það er vel. Straumur ferðamanna frá Kína til Íslands heldur einnig áfram að aukast og þess má vænta að sú þróun haldi áfram, m.a. með tilkomu flugs milli Íslands og Kína. Ég vona einnig að Íslendingar nýti tækifærið og heimsæki þetta stórbrotna land sem Kína er,“ segir Þorgerður Katrín Gunnarsdóttir í tilkynningu frá Stjórnarráðinu.
„Það var hins vegar líka mikilvægt að nota þetta tækifæri til að ræða alþjóðamál, enda blikur á lofti og brýnt að hvetja kínversk stjórnvöld til að beita sér með jákvæðum hætti. Ég tók til að mynda sérstaklega upp árásarstríð Rússa í Úkraínu og biðlaði til Kínverja að beita áhrifum sínum á rússneska ráðamenn eins og hægt er,“ segir hún enn fremur.
Ísland og Kína tóku upp stjórnmálasamband árið 1971. Ríkin undirrituðu fríverslunarsamning árið 2013 og tók hann gildi árið eftir. Ísland varð þar með fyrsta Evrópuríkið til að gera slíkan samning við Kína. Á fundinum lýsti Þorgerður Katrín vilja Íslands til að vinna með Kínverjum að uppfærslu fríverslunarsamningsins og dýpka samstarfið meðal annars á sviði sjávarútvegs, jarðhita, grænnar orku og norðurslóða.
Athugasemdir