Jódís Skúladóttir, fyrrverandi þingkona Vinstri grænna, gagnrýnir Sverri harðlega fyrir umfjöllun hans um líflátshótanir sem hún hefur fengið. Hún segir hann gera hægrimenn og stefnu þeirra í útlendingamálum að fórnarlömbum umræðunnar og líkir málflutningnum við það þegar umræðunni um kynferðisofbeldi er snúið af leið.
„Ég nenni ekki að hlusta á þennan tappa snúa út úr orðum mínum,“ skrifar Jódís í Facebook-færslu þar sem hún bregst við frétt um umfjöllun Sverris Helgasonar í Nútímanum.
Hún segist strax hafa hugsað til sambærilegrar afbökunar í umræðunni um kynferðisofbeldi. Þar sé athyglinni gjarnan beint frá meginmálinu með því að draga fram einstök dæmi um konur sem beitt hafi ofbeldi, þrátt fyrir að tölfræði sýni að mikill meirihluti gerenda í nauðgunarmálum sé karlkyns.
Jódís segir sama mynstur birtast í umræðunni um útlendingamál. Þegar brot einstakra útlendinga séu dregin fram sé umræðunni snúið að því að „vondu múslimarnir“ séu hættulegir. Hún bendir hins vegar á að Íslendingar séu enn í meirihluta þeirra sem koma fyrir dómstóla vegna afbrota.
Hún gagnrýnir Sverri fyrir að snúa umræðunni þannig að hægrimenn og stefna þeirra í útlendingamálum verði fórnarlömbin.
„Hér erum við að tala um stefnu hægrisinna sem byggir á skilvirkni og oft mannvonsku. Stefnu sem byggir á sundrungu og rasisma og elur á ótta og aðgreiningu,“ skrifar Jódís.
Hún segir stefnu þessa hafa birst í sinni ljótustu mynd í fangabúðum, þjóðarmorðum og útrýmingu. Þá segir hún fólk vinstra megin í stjórnmálum vera brjálað yfir því að fulltrúar þess standi ekki í lappirnar og stöðvi hægristefnuna, hvort sem það sé yfirhöfuð hægt eða ekki.
Jódís segir þversögn felast í því að samkvæmt málflutningi Sverris séu hægrimenn, sem vilji brottvísa fólki í stórum stíl, orðnir „góðu gæjarnir“ en vinstrifólk sem berjist fyrir mannréttindum orðið „vonda fólkið“.
Hún tekur þó skýrt fram að líflátshótanir og hótanir um ofbeldi séu aldrei í lagi, sama hvaðan þær komi.
Í lok færslunnar dregur hún saman afstöðu sína með þessum orðum:
„Það er verra að brjóta mannréttindi fólks á flótta en að öskra á einhverja forréttinda þingkonu eins og ég sannarlega var.“
Athugasemdir