Fíkniefnabóndi í Reykjavík dæmdur í fangelsi

Karl­maður hefur verið dæmdur í sex mán­aða fang­elsi, þar af einn mánuð óskil­orðs­bund­inn, fyrir umfangs­mikil fíkni­efna­laga­brot og ítrekuð umferð­ar­laga­brot. Dómurinn var kveð­inn upp í Hér­aðs­dómi Reykja­víkur 3. nóv­em­ber síð­ast­lið­inn. Maðurinn var jafn­framt sviptur öku­rétti ævi­langt.

Málið á rætur að rekja til lög­reglu­að­gerða í Reykja­vík í des­em­ber 2024. Við hús­leit í bíl­skúrs­rými fundu lög­reglu­menn 184 kanna­bis­plöntur, rúm 4,4 kíló af marí­húana og tölu­vert magn ann­arra kanna­bis­efna.

Við leit í íbúð manns­ins fund­ust einnig 655 grömm af marí­húana, kanna­bis­plöntur, kanna­bis­lauf og stönglar, auk smærra magns af ketamíni, kóka­íni og lyf­seð­ils­skyldum lyfjum.

Rúmlega 1,7 milljónir í reiðufé

Lögregla lagði jafn­framt hald á 1.753.500 krónur í reiðufé sem fund­ust í stiga­húsi og á skrif­borði í íbúð í mið­borg Reykja­víkur. Ákæru­valdið taldi pen­ing­ana vera ágóða af fíkni­efna­sölu og ákærði mann­inn upp­haf­lega fyrir pen­inga­þvætti. Sá ákæru­liður var hins vegar felldur niður við fyr­ir­töku máls­ins.

Maðurinn var einnig ákærður fyrir að hafa ekið bif­reið sviptur öku­rétt­indum og undir áhrifum áfengis og fíkni­efna í nóv­em­ber 2024. Í blóði hans mæld­ist áfengi og oxýkó­don.

Við ákvörðun refs­ingar var litið til þess að mað­ur­inn hafði áður gerst sekur um sam­bæri­leg umferð­ar­laga­brot. Um var að ræða þriðja brot hans vegna akst­urs undir áhrifum ávana­bind­andi efna innan ítrek­un­ar­tíma.

Maðurinn ját­aði brot sín ský­laust. Dómurinn tók jafn­framt mið af því að hann hafði gripið til ráð­staf­ana til að bæta líf sitt og að veru­legar tafir hefðu orðið á útgáfu ákæru.

Fimm mán­uðir fang­els­is­refs­ing­ar­innar voru því skil­orðs­bundnir til tveggja ára.

Dómurinn stað­festi einnig upp­töku fíkni­efna, rækt­un­ar­bún­aðar og reiðu­fjár­ins.