VÍS tryggingar hafa verið dæmd til að greiða manni tæpar 15,9 milljónir króna vegna afleiðinga alvarlegs umferðarslyss sem hann lenti í árið 2020. Dómur féll í Héraðsdómi Reykjavíkur á sunnudag.
Maðurinn starfaði sjálfstætt sem sendibílstjóri og rak eigið fyrirtæki þegar slysið varð 30. júní 2020. Bifreið var þá ekið í veg fyrir bifhjól hans með þeim afleiðingum að hann rakst á bifreiðina, kastaðist af hjólinu og lenti á gangstétt.
Hann var fluttur á bráðadeild og dvaldi í þrjá daga á gjörgæslu. Hann hlaut fjöláverka, meðal annars á höfði, sköflungi og úlnlið.
Samkvæmt matsgerð var maðurinn algjörlega óvinnufær frá slysdegi til desember 2021. Varanlegur miski hans var metinn 35 stig og varanleg örorka 90 prósent, að teknu tilliti til fyrra örorkumats vegna slyss árið 2018.
Ágreiningur mannsins og VÍS snerist einkum um hvaða tekjur ætti að leggja til grundvallar við útreikning bóta. Maðurinn taldi að auk launatekna ætti að taka tillit til hagnaðar fyrirtækis hans, enda hefði hann verið eini eigandi þess og starfsmaður. VÍS taldi hins vegar að eingöngu ætti að miða við launatekjur.
Dómurinn féllst á sjónarmið mannsins. Talið var sýnt fram á að hagnaður fyrirtækisins hefði að öllu leyti orðið til vegna vinnuframlags hans og að hann hefði nýtt hagnaðinn til framfærslu.
VÍS var því dæmt til að greiða manninum 15.889.893 krónur auk vaxta og dráttarvaxta. Félaginu var jafnframt gert að greiða 960 þúsund krónur í málskostnað til ríkissjóðs.
Athugasemdir