Sigurjón Þórðarson, þingmaður Flokks fólksins, gagnrýndi harðlega vaxtamun og gjaldtöku íslensku bankanna í ræðu undir liðnum störf þingsins á Alþingi í dag. Sagði hann hagnað bankanna hafa náð áður óþekktum hæðum á sama tíma og fyrirtæki og heimili glímdu við háan vaxtakostnað.
Sigurjón sagði gróða bankanna mikinn á alla mælikvarða og langt umfram eigin markmið þeirra um arðsemi eigin fjár. Þá sagði hann vaxtamun íslensku bankanna ævintýralega mikinn og margfaldan á við það sem þekkist meðal annars í Færeyjum.
„Það er eðlilegt að fólk spyrji: Hvaðan kemur allur þessi hagnaður? Jú, hann kemur auðvitað frá viðskiptavinunum,“ sagði Sigurjón.
Hann sagði það ekki fara saman að hagnaður fjármálakerfisins væri aukinn verulega á sama tíma og rekstrarskilyrði fyrirtækja, sem héldu atvinnulífinu gangandi, yrðu sífellt erfiðari. Fjármálakerfið tæki að hans mati æ stærri hluta af verðmætasköpun fyrirtækja, meðal annars í byggingariðnaði.
Sigurjón beindi jafnframt sjónum að vaxtastefnu Seðlabanka Íslands og sagði stjórnendur bankanna eiga að taka undir gagnrýni Flokks fólksins á hana.
„Þeir ættu að sýna ábyrgð og kunna sér magamál, sérstaklega á þeim tímum þegar Seðlabankinn skrúfar upp vexti fram úr öllu hófi,“ sagði hann.
Sigurjón sagði mikilvægt að bankar væru reknir með hagnaði og ábyrgð en taldi núverandi stöðu ganga of langt. Hann nefndi sérstaklega Landsbankann og sagði hreinan vaxtamun ríkisbankans vera á fjórða prósent það sem af væri árinu.
Að hans mati ættu stjórnvöld að setja Landsbankanum skýra eigendastefnu um vaxtamun og kostnað.
„Sú okurstefna sem er nú uppi er óábyrg,“ sagði Sigurjón og varaði við því að verði stefnunni haldið óbreyttri muni bankinn „éta útsæðið“.
Athugasemdir