Þekktur einstaklingur sem reyndi að koma í veg fyrir að tveir fjölmiðlar birtu niðurstöður rannsókna sinna á meintri óviðeigandi hegðun hans hefur tapað dómsmáli við hæstarétt í Lundúnum. Dómari hafnaði kröfu hans um varanlegt bann við birtingu nafns síns.
Manninum er gefið að sök að hafa misnotað stöðu sína í mörg ár til að eiga í óviðeigandi og misnotkunarkenndum kynferðislegum samskiptum við fjölda stúlkna og ungra kvenna.
Maðurinn höfðaði mál gegn fjölmiðlafyrirtækjunum Independent Television News (ITN) og Guardian News and Media (GNM), útgefanda The Guardian, til að koma í veg fyrir birtingu ásakananna.
Hann hefur ávallt neitað þeim og hélt því fram fyrir dómi að birting gæti haft banvænar afleiðingar fyrir hann. Hann hefur áður gert tvær sjálfsvígstilraunir og vísaði til þess að hætta væri á að hann svipti sig lífi.
Lögmaður hans sagði að birtingin gæti haft „mögulega banvænar afleiðingar“ og að umbjóðandi sinn hefði engan ásetning um að snúa aftur til opinbers lífs.
Lögmenn fjölmiðlanna sögðu hins vegar að ásakanirnar vörðuðu misnotkun valds og stöðu og að ríkir almannahagsmunir væru af því að þær kæmu fram. Þær hefðu komið í ljós eftir víðtæka og ítarlega rannsókn.
Í úrskurði sínum lagði dómarinn áherslu á að dómstóllinn hefði ekki tekið afstöðu til þess hvort ásakanirnar væru sannar. Höfnun kröfunnar fæli heldur ekki í sér samþykki dómstólsins fyrir birtingu þeirra.
Maðurinn hyggst áfrýja niðurstöðunni og hefur fengið tímabundið lögbann sem kemur í veg fyrir að hann verði nafngreindur á meðan áfrýjunin er til meðferðar.
Athugasemdir