Segir Netanyahu þrýsta á Trump um kjarnorkuárás

Banda­ríkja­stjórn gæti verið í þann mund að gera kjarn­orku­árás á Íran innan fárra daga, að sögn banda­ríska fjöl­miðla­manns­ins Tucker Carlson. Hann heldur því fram að Benjamin Net­anyahu, for­sæt­is­ráð­herra Ísraels, beiti Donald Trump Banda­ríkja­for­seta miklum þrýst­ingi um að grípa til slíkrar árásar.

Carlson setti fram þessar full­yrð­ingar í færslu á sam­fé­lags­miðl­inum X. Þar segir hann að hugs­an­legt skot­mark sé Pickax-fjall í mið­hluta Írans, þar sem ísra­elskar leyni­þjón­ustu­heim­ildir telji að írönsk stjórn­völd hafi hafið auðgun úrans á ný.

Carlson heldur því fram að engin hefð­bundin vopn í vopna­búri Banda­ríkja­hers geti grandað göngum sem liggi um 90 metra undir föstu graníti og að kjarn­orku­vopn séu því eini raun­hæfi hern­að­ar­kost­ur­inn. Hann segir Net­anyahu hafa þrýst á Trump um að grípa til þess­arar aðgerðar og hefur eftir ónafn­greindum heim­ild­ar­manni að for­sæt­is­ráð­herr­ann hringi í Trump um málið á hverjum degi.

Segir Netanyahu þurfa stríðið til að halda völdum

Carlson heldur því jafn­framt fram að Net­anyahu sé í erf­iðri stöðu eftir nýaf­staðnar kosn­ingar í Ísrael og geti ekki myndað rík­is­stjórn nema Trump grípi beint inn í ísra­elsk stjórn­mál og hjálpi honum að tryggja sér meiri­hluta á þingi.

Að mati Carlson þurfi Net­anyahu að halda nánum tengslum við Trump og hafi því sér­stakan hag af því að stríðið við Íran haldi áfram.

Hann segir Net­anyahu hafa beitt nán­ustu banda­menn sína innan banda­rísku rík­is­stjórn­ar­innar þrýst­ingi, meðal ann­ars Pete Hegseth varn­ar­mála­ráð­herra og Brad Cooper, yfir­mann banda­rísku mið­stjórn­ar­innar (CENTCOM). Þeir séu and­vígir samn­inga­við­ræðum um að binda enda á stríðið og vilji hefja umfangs­miklar hern­að­ar­að­gerðir á ný.

Carlson nefnir einnig Marco Rubio utan­rík­is­ráð­herra og John Ratcliffe, for­stjóra banda­rísku leyni­þjón­ust­unnar CIA, í þessu sam­hengi. Hann heldur því jafn­framt fram að Barack Obama, fyrr­ver­andi Banda­ríkja­for­seti, hafi lýst sig and­vígan frið­ar­samn­ingi við Íran sem unnið sé að í Doha.

Óttast afleiðingar fyrir heimsbyggðina

Carlson segir önnur ríki við Persaflóa ótt­ast frek­ari átök. Hann full­yrðir að Net­anyahu hafi farið í leyni­lega heim­sókn til Abu Dhabi þann 27. sept­em­ber til að fá Sam­ein­uðu arab­ísku fursta­dæmin til að styðja loka­hern­að­ar­að­gerð gegn Íran, en að fursta­dæmin hafi hafnað því.

Hann varar við því að frek­ari átök gætu haft gríð­ar­leg áhrif á efna­hag ríkja við Persaflóa, alþjóð­lega orku- og áburð­ar­mark­aði og flutn­inga á olíu. Carlson segir 11 stór olíu­flutn­inga­skip hafa orðið fyrir miklum skemmdum í Hor­mússundi í októ­ber einum saman.

Hann telur að kjarn­orku­árás á Pickax-fjall gæti haft enn alvar­legri afleið­ingar. Geisla­virk mengun frá kjarn­orku­sprengju sem spryngi á yfir­borði fjalls­ins gæti borist til Persaflóa og mengað vatns­birgðir sem um 100 millj­ónir manna reiða sig á.

Carlson varar einnig við því að slík árás gæti skapað hættu­legt for­dæmi fyrir önnur ríki. Hann heldur því fram að Rússar hafi þegar gefið að minnsta kosti tveimur rík­is­stjórnum til kynna að kjarn­orku­árás Banda­ríkj­anna á Íran myndi veita þeim svig­rúm til að beita kjarn­orku­vopnum gegn Úkraínu. Þá gætu átök milli Indlands og Pakist­ans eða árás Norður-Kóreu á Seúl einnig þró­ast í kjarn­orku­stríð.

„Eftir fyrstu kjarn­orku­árás­ina er þriðja heims­styrj­öldin óhjá­kvæmi­leg,“ skrifar Carlson og varar við því að slíkt stríð yrði skamm­vinnt og end­an­legt.

Segir Trump ekki hafa tekið ákvörðun

Carlson heldur því fram að banda­rísk stjórn­völd hafi frá því í febr­úar unnið að breyt­ingum á kjarn­orku­stefnu lands­ins sem geri auð­veld­ara að beita svoköll­uðum taktískum kjarn­orku­vopnum fyrst í átökum.

Samkvæmt heim­ildum sem Carlson vísar til gæti Trump tekið ákvörðun um hvort beita eigi kjarn­orku­vopnum fyrir næstu helgi, eða 7. nóv­em­ber. Hann segir for­set­ann þó enn hika og hlusta á vara­for­set­ann JD Vance og sér­stakan erind­reka sinn, Steve Witkoff, sem telji að hægt sé að ná sam­komu­lagi við Íran.

Carlson tekur undir það sjón­ar­mið, þótt hann við­ur­kenni að samn­inga­við­ræður verði erf­iðar. Hann segir að þrátt fyrir harð­ari afstöðu sumra innan íranskra stjórn­valda sé almennur vilji meðal þeirra sem rætt hafi við ákvörð­un­ar­taka í land­inu til að binda enda á átökin og ná sam­komu­lagi.

Í lok færsl­unnar segir Carlson að almenn­ingur heims­ins hafi ekki verið hafður með í ráðum, þótt hund­ruð millj­óna manna gætu þurft að gjalda fyrir ákvörðun um kjarn­orku­árás. Hann hvetur fólk til að láta í sér heyra áður en það verður um seinan.

Carlson gagnrýndur

Carlson, sem studdi Donald Trump lengi vel en hefur nú snúið baki við honum, hefur fengið á sig mikla gagnrýni frá fólki sem segir þessa færslu falsaða og hreinan skáldskap.

Spencer Pratt, fyrr­ver­andi fram­bjóð­andi til borg­ar­stjóra Los Angeles, sagði að þörf væri á „skor­korti yfir heimsenda­skelf­ingu“.

„Í hvert sinn sem ein­hver lýsir yfir borg­ara­styrj­öld, lofts­lags­heimsendi eða kjarn­orkuragnarökum og þriðju heims­styrj­öld­inni í 9.000. skiptið, ræt­ist það aldrei, en við höldum bara áfram, svo fimm mán­uðum síðar gera þeir það aftur og fólk lætur blekkj­ast, enn á ný,“ sagði Pratt.