Modlin-flugvelli í Varsjá í Póllandi hefur verið lokað ótímabundið eftir að flugvél frá Lundúnum þurfti að lenda þar vegna upplýsinga um mögulegt sprengiefni um borð.
Í tilkynningu frá flugvallaryfirvöldum kemur fram að vélin hafi lent þar með ófyrirséðum hætti í morgun eftir að upplýsingar bárust um sprengju um borð. Flugvöllurinn verður lokaður þar til annað verður ákveðið á meðan öryggissveitir kanna hvort ógnin sé raunveruleg.
Vélin lenti heilu og höldnu og stendur öryggisrannsókn yfir. Modlin-flugvöllur er í um 40 kílómetra fjarlægð norður af miðborg Varsjár.
Sambærilegt atvik í Búdapest í gær
Þetta er annað sambærilega atvikið á skömmum tíma. Í gær þurfti farþegaflugvél Wizz Air, sem var á leið frá Lundúnum til Sófíu í Búlgaríu, að nauðlenda á flugvellinum í Búdapest vegna sprengjuhótunar sem barst þegar vélin var á lofti.
Áhöfnin óskaði eftir lendingarleyfi og ungversk orrustuþota fór á loft til að fylgja vélinni til Liszt Ferenc-alþjóðaflugvallarins í Búdapest.
Eftir lendingu fóru fram öryggisathuganir á vélinni og farþegum. Ekkert grunsamlegt fannst og vélin hélt ferð sinni áfram að loknu eftirliti.
Wizz Air sagði í yfirlýsingu að félagið hefði verið í fullu samstarfi við yfirvöld og að öryggi farþega og áhafnar væri áfram í forgangi.
Athugasemdir