Þúsundir maríubjalla hafa gert sig heimakomnar á heimilum og í almenningsgörðum víðs vegar um Bretland. Sumar þeirra bera með sér sníkjusvepp sem getur smitast á milli maríubjallategunda, en er þó algjörlega skaðlaus mönnum.
Bretar hafa líkt innrás skordýranna við plágu og einn þeirra segir að sér hafi hreinlega verið „ráðist á“ sig af þessum doppóttu bjöllum.
Norðausturhluti Englands hefur orðið sérstaklega fyrir barðinu á bjöllunum. Íbúar hafa leitað á samfélagsmiðla til að deila undrun sinni á fjöldanum sem hefur skyndilega látið sjá sig.
Myndir hafa birst af gluggakistum, görðum, girðingarstaurum, fánastöngum og sendibílum sem eru þaktir maríubjöllum. Tilkynningar hafa borist frá meðal annars Newcastle, Durham, Teesside, Cumbria og Tyneside.
Einn íbúi í Tyne and Wear skrifaði á Facebook:
„Hefur einhver annar orðið fyrir árás frá þessari maríubjölluplágu í dag? Þetta er það ótrúlegasta sem ég hef séð!“
Aðrir hafa tekið eftir ágengri tegund sem kallast harlequin-maríubjöllur. Einn netverji skrifaði: „Ég hef aldrei séð svona margar harlequin-maríubjöllur. Sumar grafirnar í kirkjugarðinum voru þaktar þeim.“
Fleiri kvörtuðu undan „fáránlega miklum fjölda maríubjalla“ og sögðust bókstaflega aldrei hafa séð annað eins.
Safnast saman til að komast í vetrardvala
Þegar maríubjöllur birtast skyndilega í þúsundatali er það hluti af undirbúningi þeirra fyrir veturinn, svokölluðum vetrardvala eða diapause.
Þegar kólnar í veðri og náttúruleg fæða verður af skornum skammti safnast bjöllurnar saman í stórum hópum, meðal annars á gluggakistum og inni á heimilum. Þær losa frá sér ferómón, efnaboð sem laða fleiri bjöllur að.
Tim Coulson, prófessor og yfirmaður líffræðideildar Oxford-háskóla, sagði við Independent árið 2025 að þetta væri sá tími árs þegar maríubjöllurnar leituðu sér að stað þar sem þær gætu haft hægt um sig yfir veturinn.
Sumir sem hafa fylgst með bjöllunum hafa þó tekið eftir því að útlit þeirra sé óvenjulegt og þær virðist jafnvel vera „gervilegar“.
Íbúi í South Tyneside skrifaði á Facebook að heimili sitt væri bókstaflega yfirfullt af slíkum bjöllum og að þær skiptu þúsundum.
Myndir benda til þess að stór hluti skordýranna sé af ágengri tegund sem kallast harlequin-maríubjalla.
Bera með sér sníkjusvepp
Samkvæmt Max Barclay, yfirsafnverði bjöllusafns Náttúrufræðisafnsins í Lundúnum, eru harlequin-maríubjöllur nokkuð auðþekkjanlegar. Þær eru til í ýmsum litum, allt frá rauðum með svörtum doppum yfir í appelsínugular og jafnvel svartar með rauðum doppum. Tegundin er ekki upprunnin í Bretlandi en var flutt þangað inn til að nýta hana sem náttúrulega meindýravörn.
Það sem margir vita hins vegar ekki er að þessar bjöllur geta borið með sér sníkjusvepp sem kallast Laboulbenia. Sveppurinn myndar örsmáar hreisturmyndaðar skellur á vængjum bjallanna og getur smitast yfir í innlendar maríubjöllutegundir. Hann er þó með öllu skaðlaus fólki.
Einn netverji varaði aðra við harlequin-bjöllunum á Facebook og sagði þær líkjast maríubjöllum en vera svartar með rauðum merkingum. Hann benti á að tegundin væri ágeng, ógnaði innlendum tegundum og gæti bitið fólk. Annar skrifaði að þetta væru ekki venjulegar maríubjöllur heldur asískar maríubjöllur sem væru ágeng tegund.
Geta skilið eftir óþægilega lykt og bletti
Þótt harlequin-maríubjöllurnar séu skilgreindar sem ágeng tegund eru þær ekki hættulegar fólki. Þær geta þó verið til mikilla óþæginda og sækja gjarnan í hlý heimili.
Samtök meindýravarna í Bretlandi (BPCA) segja bjöllurnar ekki valda skemmdum á byggingum. Þær geta hins vegar gefið frá sér gulleitan varnarvökva sem lyktar illa og getur skilið eftir bletti í efnum. Þeim sem vilja losna við bjöllurnar úr húsum sínum er ráðlagt að forðast að kremja þær, þar sem þá geta þær sprautað frá sér vökvanum. Betra sé að sópa þeim varlega upp með kústi og fægiskóflu og fjarlægja þær þannig.
Átján tegundir á Íslandi
Alls hafa 18 tegundir maríubjalla verið greindar hér á landi. Aðeins tvær þeirra eiga sér náttúruleg heimkynni á Íslandi, en vísbendingar eru um að þriðja tegundin sé mögulega að ná fótfestu. Aðrar tegundir hafa borist hingað tilfallandi, einkum með innfluttum ávöxtum og grænmeti en einnig jólatrjám.
Athugasemdir