Írski ferðalangurinn Michael Guilfoyle segir ferð um hálendi Íslands hafa verið einstaka upplifun, langt frá heitum laugum, ferðamannafjölda og öðrum þeim þáttum sem erlendir gestir tengja gjarnan við Ísland. Guilfoyle fjallar um ferðina í grein sem birtist í The Irish Times á mánudag.
Guilfoyle ferðaðist ásamt hópi vina um miðhálendið síðla sumars en ferðalangarnir voru á aldrinum rúmlega sextugs og upp í áttrætt. Hópurinn leigði sér öflugan jeppa fyrir 4.300 evrur og hélt meðal annars að Herðubreið, Öskju og Kverkfjöllum.
„Það voru forréttindi fyrir okkur að komast inn á hálendið einn dag síðla sumars,“ skrifar Guilfoyle.
Ferðin var þó ekki hættulaus. Á F88 þurfti hópurinn að aka yfir Jökulsá á Fjöllum og viðurkennir Guilfoyle að ferðalangarnir hafi verið óvanir slíkum aðstæðum. Þeir hafi horft á ána í tíu mínútur með vélina í gangi áður en ákveðið var að láta vaða.
„Við vorum ekki vanir því að fara yfir ár af óþekktu dýpi og því störðum við á hana í heilar tíu mínútur,“ skrifar hann. Jeppinn hafi þó komist yfir án teljandi vandræða.
Ferðalangarnir gistu meðal annars við Herðubreið og Öskju og segir Guilfoyle gönguferðir um Öskjusvæðið hafa verið hápunkt ferðarinnar. Þar hafi hópurinn gengið um snjó, hraun og vikur og virt fyrir sér Öskjuvatn.
Veður og snjóalög komu í veg fyrir fyrirhugaða leið suður um hálendið og því hélt hópurinn austur á þjóðveg eitt.
Suðurströndin olli hins vegar nokkrum vonbrigðum vegna rigningar og ferðamannafjölda. Óvænt dagsferð til Heimaeyjar reyndist aftur á móti afar vel heppnuð.
Eftir ellefu nætur í tjaldi sagðist Guilfoyle ekki hafa viljað skipta tjaldstæðinu út fyrir hótel við Keflavíkurflugvöll, sérstaklega þegar hótelnóttin kostaði yfir 300 evrur en tjaldstæðið aðeins um 20 evrur.
Athugasemdir