Þingmenn stjórnarandstöðunnar kröfðust þess við upphaf þingfundar í dag að Daði Már Kristófersson fjármála og efnahagsráðherra mætti á Alþingi hið fyrsta og svaraði fyrir starfslok Harðar Arnarsonar, fyrrverandi forstjóra Landsvirkjunar. Þingmenn vísuðu meðal annars til nýrra gagna um samskipti ráðherra og stjórnar fyrirtækisins.
Krefjast þess að ráðherra mæti á þing
Guðlaugur Þór Þórðarson, þingmaður Sjálfstæðisflokksins, rifjaði upp svör Daða Más á Alþingi 19. október um starfslok Harðar, sem hafði gegnt starfi forstjóra Landsvirkjunar í 17 ár.
„Nú liggur það fyrir að þær upplýsingar sem hæstv. ráðherra gaf þinginu eru ekki réttar,“ sagði Guðlaugur og bætti við að ráðherrann hefði áður sagt að öll sagan væri sögð og að Hörður hefði ekki hrökklast úr starfi.
„Það er augljóslega ekki rétt,“ sagði Guðlaugur og krafðist þess að ráðherrann mætti á þingið í dag til að útskýra málið.
Sigríður Á. Andersen, þingmaður Miðflokksins, vakti athygli á upplýsingum um að stjórn Landsvirkjunar hefði átt níu fundi með ráðherra á tiltölulega skömmum tíma. Sagði hún það vekja spurningar í ljósi yfirlýsinga ríkisstjórnarinnar um faglega stjórnarhætti og armslengd stjórnmálanna frá ríkisfyrirtækjum.
Hildur Sverrisdóttir, þingmaður Sjálfstæðisflokksins, sagði gögn málsins sýna mikið misræmi sem kallaði á skýringar.
„Nú erum við að sjá atburðarás út frá gögnum sem sýna í besta falli mikið misræmi sem þarfnast mikillar útskýringar gagnvart þinginu og í versta falli ósannindi af hálfu ráðherra,“ sagði Hildur.
Jón Gunnarsson, þingmaður Sjálfstæðisflokksins, gekk enn lengra og sagði skrifleg gögn benda til þess að ráðherra hefði sagt þinginu ósatt gegn betri vitund. Sagði hann það eitt það alvarlegasta sem gæti gerst í þingsal.
Sigurður Ingi Jóhannsson, þingmaður Framsóknarflokksins, tók undir kröfuna um að ráðherra mætti fyrir þingið. Hann sagði óhjákvæmilegt að stjórnskipunar og eftirlitsnefnd tæki málið jafnframt til skoðunar.
„Það er búið að vera þöggun hér í þessari umræðu af hálfu fjármálaráðherra og stjórnarinnar,“ sagði Sigurður Ingi og bætti við að málið virtist verða alvarlegra eftir því sem fleiri upplýsingar kæmu fram.
Sigurjón kallaði umræðuna upphlaup
Tilefni umræðunnar eru meðal annars gögn um fundahöld ráðherra og stjórnar Landsvirkjunar án Harðar. Samkvæmt fundargerð fjármála og efnahagsráðuneytisins ræddi Daði Már meðal annars ágreining Landsvirkjunar og Landsnets við stjórn fyrirtækisins 6. janúar síðastliðinn án þess að Hörður væri viðstaddur.
Sigurjón Þórðarson, þingmaður Flokks fólksins, gagnrýndi hins vegar málflutning stjórnarandstöðunnar og kallaði umræðuna „upphlaup“. Sagði hann eðlilegra að málið yrði tekið fyrir í stjórnskipunar og eftirlitsnefnd.
Þórunn Sveinbjarnardóttir, forseti Alþingis, sagði að lokum að hún hefði móttekið óskir þingmanna og myndi koma þeim til skila.
Athugasemdir