Þúsundir danskra ungmenna hyggjast safnast saman í Kaupmannahöfn í dag til að mótmæla áformum ríkisstjórnar Danmerkur um að skerða námsstyrki til að fjármagna aukin útgjöld til varnarmála.
Mótmælin fara fram undir yfirskriftinni „Nóg er komið“ og standa ellefu samtök framhaldsskóla- og háskólanema að þeim. Gert er ráð fyrir að um tíu þúsund ungmenni safnist saman á Ráðhústorginu klukkan 12:30 að staðartíma áður en gengið verður að danska þinghúsinu. Sambærileg mótmæli eru fyrirhuguð víðar um landið.
Samkvæmt fjárlagafrumvarpi ríkisstjórnarinnar stendur til að afnema námsstyrki til þeirra sem búa hjá foreldrum sínum og hafa samanlagðar árstekjur yfir 700 þúsund danskar krónur, jafnvirði um 14 milljóna íslenskra króna.
Menntamálaráðuneytið áætlar að um 14 þúsund námsmenn missi styrkina alfarið og að styrkir um átta þúsund annarra verði skertir.
Danska námsstyrkjakerfið hefur verið við lýði frá árinu 1970 og er talið ein af grunnstoðum jafnréttis til náms í landinu. Nú fá námsmenn sem búa hjá foreldrum sínum 1.154 danskar krónur á mánuði en þeir sem búa utan heimili foreldra fá 7.426 krónur.
Ríkisstjórnin hyggst einnig herða skilyrði atvinnuleysisbóta nýútskrifaðra háskólanema.
Skipuleggjendur mótmælanna leggja áherslu á að þau fari friðsamlega fram. Lögreglan í Kaupmannahöfn hefur boðað aukna viðveru vegna mótmælanna.
Athugasemdir