Fjölmiðlamaðurinn Egill Helgason telur íslenska fjölmiðla hafa fest sig í einni mestu fréttagúrku síðari ára á sama tíma og stórir atburðir eiga sér stað á alþjóðavettvangi. Ummæli hans hafa vakið töluverða athygli á Facebook og skapað líflegar umræður um fréttamat íslenskra fjölmiðla.
Egill, sem hefur áratugareynslu af fjölmiðlastörfum, segir fréttaumfjöllun síðustu vikna einkennast af endurteknum fréttum um pólitískar deilur og persónulegan ágreining.
„Ég hef starfað lengi í fjölmiðlum og sýnist að eftir ESB atkvæðagreiðsluna séum við að upplifa einhverja mestu fréttagúrku í langan tíma,“ skrifar Egill.
Hann bendir á að á meðan heimurinn standi frammi fyrir miklum átökum og óvissu séu íslenskir fjölmiðlar uppteknir af tiltölulega afmörkuðum innanlandsmálum.
„Fyrir utan leikur veröldin á reiðiskjálfi, en viði getum velt okkur vikum saman upp úr sms-sendingu innan Flokks fólksins, óánægju Jóns Gnarr, uppsögn Harðar Arnarsonar, samskiptamiðlafærslu Heimis Más Péturssonar og nú eru Þorgerður Katrín Gunnarsdóttir og Ólafur Ragnar Grímsson farin að móðga hvort annað.“
Egill segir þessi mál tröllríða fréttum dag eftir dag og veltir fyrir sér hvort aðrar þjóðir myndu ekki öfunda Íslendinga af áhyggjum þeirra.
Fyrrverandi fréttastjóri gagnrýnir vinnubrögðin
Óðinn Jónsson, fyrrverandi fréttastjóri, tekur undir gagnrýni á íslenska fjölmiðla en beinir sjónum sérstaklega að vinnubrögðum ritstjórna.
„Mikið af „fréttum” einmitt unnar úr Facebook-færslum „frægra” af því að ritstjórar senda mannskapinn ekki eftir ferskara efni,“ skrifar Óðinn í athugasemd við færslu Egils.
Ummæli þeirra hafa kallað fram ólíkar skoðanir meðal þeirra sem taka þátt í umræðunni.
Nokkrir taka undir að íslensk fréttaumfjöllun sé orðin sjálfhverf og að of mikil áhersla sé lögð á deilur stjórnmálamanna og ummæli á samfélagsmiðlum.
Aðrir hafna hins vegar þeirri niðurstöðu að umrædd mál skorti fréttagildi. Sérstaklega er bent á starfslok Harðar Arnarsonar hjá Landsvirkjun, sem sumir telja alvarlegt mál er varði stjórnarhætti og ábyrgð ráðamanna.
Þá benda aðrir á að ummæli forsvarsmanna stjórnmálaflokka um alþjóðamál geti haft verulegt fréttagildi.
Athugasemdir