Stjórn Sorpu ákvað í október 2025 að hefja á ný sendingar á drykkjarfernum til brennslu í stað þess að senda þær til endurvinnslu. Ákvörðunin markar breytingu á því fyrirkomulagi sem tekið var upp árið 2023 í kjölfar gagnrýni á meðhöndlun flokkaðra ferna.
Heimildin greinir frá þessu og hefur eftir Jóhanni Páli Jóhannssyni, umhverfis-, orku- og loftslagsráðherra, að afar lítill hluti fernanna nýtist til framleiðslu á nýjum pappír samkvæmt núverandi fyrirkomulagi. Langstærstur hluti þeirra endi í brennslu þar sem orkan er nýtt.
„Þótt brennsla á fernum með orkunýtingu sé ekki jafn ákjósanlegur kostur og endurvinnsla þá er hann skárri en urðun,“ sagði ráðherrann í samtali við Heimildina.
Árið 2023 kom í ljós að langflestar drykkjarfernur sem Íslendingar flokkuðu voru brenndar í sementsverksmiðjum á meginlandi Evrópu.
Sorpa baðst síðan afsökunar á að hafa ekki sagt almenningi nógu skýrt hvað varð um fernurnar. Stjórn Sorpu fól framkvæmdastjóra að breyta þessu og senda pappírsefnið til flokkunar í Svíþjóð.
Í júní 2023 tilkynntu Sorpa og Úrvinnslusjóður einnig að óháður aðili myndi fylgjast með endurvinnslu fernanna og staðfesta að hún væri í lagi.
Nú hefur Sorpa þó ákveðið að láta brenna fernurnar aftur og nýta orkuna sem myndast.
Athugasemdir