Ljósmynd sem Morgunblaðið birti með frétt um fjárhagsaðstoð Reykjavíkurborgar hefur vakið mikla athygli og reiði. Í fréttinni kemur fram að meira en helmingur þeirra sem þiggja aðstoðina sé af erlendum uppruna. Fjölmiðlafólk og aðrir hafa gagnrýnt myndina harðlega og segja hana villandi og óviðkomandi fréttinni.
Á myndinni var kona sem, samkvæmt þeim sem hafa tjáð sig um málið, tengist ekki efni fréttarinnar. Myndinni hefur nú verið skipt út fyrir ljósmynd af Ráðhúsi Reykjavíkur.
Egill Helgason fjölmiðlamaður segir myndbirtinguna „eitt það ljótasta sem ég hef séð í íslenskum fréttum.“ Hann bendir á að fréttin fjalli um fólk af erlendum uppruna frá ýmsum löndum sem þiggi aðstoð frá borginni, en myndin sýni konu sem hann hafi aflað sér upplýsinga um.
„Mér er tjáð að hún sé einstæð móðir, hörkudugleg, vinni sín störf af trúmennsku og hafi náð góðum tökum á íslensku,“ skrifar Egill og spyr hvað hafi vakað fyrir þeim sem ákváðu að birta myndina.
Svala Magnea Ásdísardóttir fjölmiðlafræðingur gagnrýnir einnig framsetninguna og segir myndina hafa verið mjög misvísandi. Hún bendir á að langflestir erlendir ríkisborgarar sem séu á framfærslu hér á landi séu flóttafólk frá Úkraínu, en það komi einnig fram þegar frétt Morgunblaðsins sé lesin.
Guðný Gústafsdóttir, verkefnisstjóri rannsókna hjá Félagsvísindastofnun Háskóla Íslands, tekur í sama streng og segir myndina fréttinni með öllu óviðkomandi. Hún gagnrýnir jafnframt umfjöllun Morgunblaðsins um múslima og fólk frá Palestínu.
„Morgunblaðið heldur rægingarherferð sinni gegn múslimum áfram með sérstakri áherslu á fólk frá Palestínu. Myndin sem mbl birti er fréttinni alls óviðkomandi. Fréttin fjallar ekki um mótmæli og ekki heldur um konuna á myndinni sem starfar á leikskóla í borginni.“
Guðný bendir á að samkvæmt fréttinni hafi heildarútgjöld Reykjavíkurborgar vegna fjárhagsaðstoðar til einstaklinga lækkað. Þá séu Íslendingar fjölmennasti hópur þeirra sem þiggi aðstoðina, en fólk frá Úkraínu sá næstfjölmennasti.
Hún segir það eðlilegt í ljósi þess að Úkraínumenn séu fjölmennasti hópurinn sem hafi sótt um og fengið alþjóðlega vernd hér á landi.
Guðný spyr jafnframt hvort stuðningur fólks við Úkraínu og úkraínskt flóttafólk nái einnig til þeirra sem þurfi á fjárhagsaðstoð að halda og hvort uppruni eða húðlitur fólks hafi þar áhrif.
„Hversu langt nær stuðningur þeirra við Úkraínu og úkraínska hælisleitendur á Íslandi? Eða skiptir það ekki máli af því að þeir eru hvítir á litinn?“
Í frétt Morgunblaðsins kemur fram að Reykjavíkurborg greiddi einstaklingum alls 3.429 milljónir króna í fjárhagsaðstoð á síðasta ári. Það er 669 milljónum króna minna en árið 2024.
Upplýsingarnar koma fram í svari velferðarsviðs borgarinnar við fyrirspurn Helga Áss Grétarssonar, varaborgarfulltrúa Miðflokksins og fulltrúa í velferðarráði.
Alls fengu 3.408 einstaklingar fjárhagsaðstoð í fyrra. Íslendingar voru fjölmennasti hópurinn, 1.509 talsins, eða 44,3 prósent. Hinir voru af erlendum uppruna og þeirra fjölmennastir voru einstaklingar frá Úkraínu, 790 talsins.
Þar á eftir komu Palestínumenn, 206 talsins, eða 6 prósent þeirra sem fengu fjárhagsaðstoð.
Ljósmyndinni sem gagnrýnin beindist að hefur nú verið skipt út á vef mbl.is fyrir mynd af Ráðhúsi Reykjavíkur en ljósmyndin birtist í fríblaði Morgunblaðsins.
Athugasemdir