Skiptastjóri átta gjaldþrota einkahlutafélaga, sem tengjast hótelrekstri Legendary Hotels & Resorts á Íslandi, hefur farið fram á að Igors Stals verði úrskurðaður í þriggja ára atvinnurekstrarbann vegna háttsemi hans við rekstur félaganna. Igors er faðir Dmitrijs Stals, sem var í forsvari fyrir umfangsmikil hótelfjárfestingaráform hér á landi.
Samkvæmt tilkynningu sem birtist í Lögbirtingablaðinu í dag barst krafa þess efnis Héraðsdómi Suðurlands þann 22. október síðastliðinn. Kröfuna leggur fram Torfi Ragnar Sigurðsson lögmaður, sem er skiptastjóri þrotabúanna.
Félögin átta eru Legendary Operations ehf., Legendary Travel ehf., Legendary Homes ehf., Venture Capital Iceland ehf., Legendary SPV Hella ehf., Legendary Staff Accomoda ehf., Legendary IP ehf. og Legendary SPV Ranga River ehf.
Igors Stals, sem er skráður ýmist stjórnarformaður eða stjórnarmaður félaganna, er með óþekkt lögheimili. Ekki er heldur vitað um dvalarstað hans eða vinnustað og er fyrirkallið því birt opinberlega.
Krafan verður tekin fyrir í Héraðsdómi Suðurlands á Selfossi í desember.
Hundruð milljóna króna í kröfur
Viðskiptablaðið greindi frá því í október að skiptum hefði lokið í fimm félaganna án þess að eignir fyndust í þrotabúunum. Lýstar kröfur í þrjú þeirra námu samtals 911 milljónum króna.
Legendary Hotels & Resorts keypti Hótel Hellu og Árhús í árslok 2022 og stefndi að umfangsmiklum hótelrekstri hér á landi.
Dmitrijs Stals, sonur Igors, var í forsvari fyrir Legendary Hotels & Resorts og sagði á sínum tíma við Viðskiptablaðið að stefnt væri að rekstri tólf hótela á Íslandi.
Það er hins vegar faðir hans, Igors Stals, sem skiptastjórinn krefst nú að verði úrskurðaður í atvinnurekstrarbann.
Athugasemdir