Um síðustu mánaðarmót var framkvæmdastjóra Heilbrigðiseftirlits Austurlands (HAUST), Láru Guðmundsdóttur, sagt upp. Öllum fimm starfsmönnum stofnunarinnar hafði verið sagt upp mánuði áður. Fram kemur í umfjöllun Austurfréttar að ástæða uppsagnanna séu grundvallarbreytingar á starfsemi heilbrigðiseftirlita um allt land, sem ganga í gegn um áramótin.
Ríkisstofnanirnar Umhverfis- og orkustofnun og Stofnun atvinnuveganna mun frá og með áramótum sjá um og sinna eftirlitinu á öllu landinu.
Enn er óljóst hvort hluti heilbrigðiseftirlitsins verður áfram á hendi sveitarfélaganna eftir áramót, eins og Austurfrétt hefur áður fjallað um. Stefán Þór Eysteinsson, formaður stjórnar HAUST, staðfesti fyrr í dag að óvissan væri enn til staðar, þótt innan við 40 virkir dagar séu til áramóta.
„Það ríkir enn óvissa til dæmis um hvað gerist varðandi neysluvatnið. Ný reglugerð um það á að koma í þessum mánuði sem vonandi varpar ljósi á hver á að gera hvað. Hvort það verður hjá nýrri Stofnun atvinnuveganna eða sveitarfélögunum liggur ekki fyrir fyrr en reglugerðin nýja verður opinberuð. Svo eftir því sem ég kemst næst er baðvatn ekki eitthvað sem þessar ríkisstofnanir ætla að sinna svo það er líka dálítið í lausu lofti hvernig á að haga eftirliti með því á hinum ýmsu stöðum.“
Stefán segir að tveir starfsmenn HAUST hafi fengið annað starf eða loforð um starf. Hann var spurður um stöðu starfsfólksins eftir að allir starfsmenn nema framkvæmdastjórinn fengu uppsagnarbréf í lok september. Sex hafa starfað hjá HAUST á árinu, sumir í hlutastarfi.
„Við sáum okkur í stjórn HAUST knúin til að segja framkvæmdastjóranum upp fyrir síðustu mánaðarmót vegna þessara miklu lagabreytinga á fyrirkomulagi heilbrigðiseftirlits. Stjórnin öll harmar þá stöðu sem uppi er og þá óvissu sem starfsfólkið hefur búið við um hríð vegna þessara stjórnkerfisbreytinga. Stjórnin öll þakkar framkvæmdastjóra og starfsfólkinu fyrir fagleg og góð störf gegnum tíðina.“
Athugasemdir