Matvælastofnun segir mikilvægt að almenningur tilkynni um grun um brot á velferð dýra en áréttar að aðgerðir þeirra sem telji á dýrum brotið megi aldrei valda þeim frekari þjáningum.
Matvælastofnun hefur sent frá sér tilkynningu í kjölfar frétta af innbrotum í svínabú á Kjalarnesi þar sem myndskeið voru tekin af aðstæðum dýranna.
Stofnunin segir ábendingar um aðbúnað og umhirðu dýra ávallt teknar alvarlega. Berist upplýsingar um möguleg brot á velferð dýra séu þau rannsökuð og gerðar kröfur til umráðamanna um úrbætur reynist ábendingarnar á rökum reistar.
MAST leggur þó áherslu á að aðferðir þeirra sem telja að brotið sé á dýrum megi aldrei valda dýrunum þjáningum eða auka þær.
Stofnunin minnir jafnframt á að hún hafi reglubundið eftirlit með öllu dýrahaldi í landinu, þar á meðal svínabúum, og fylgi eftir frávikum sem upp kunna að koma í aðbúnaði eða umhirðu dýra.
Athugasemdir