Karlmaður á fertugsaldri hefur verið ákærður fyrir sérstaklega hættulega líkamsárás, vopnalagabrot, þjófnaði og fíkniefnalagabrot. Málin fjögur verða tekin fyrir í Héraðsdómi Norðurlands eystra í desember.
Alvarlegasta ákæran varðar árás sem átti sér stað í íbúð á Akureyri aðfaranótt 23. ágúst 2024. Samkvæmt ákæru réðst maðurinn á annan Akureyring, sem hann bjó með þegar atvikið átti sér stað, og sló hann ítrekað í höfuðið með útdraganlegri kylfu. Mennirnir eru báðir Íslendingar.
Brotaþolinn hlaut tvo skurði á höfði, báða um fjögurra til fimm sentímetra langa. Annan skurðinn, sem var í hársverði, þurfti að sauma með fjórum sporum.
Kylfa með sprautunálum
Tveimur dögum eftir árásina lagði lögregla hald á óvenjuleg vopn í íbúð ákærða. Þar fundust meðal annars gaddakúla í bandi og kylfa með álímdum sprautunálum.
Maðurinn er ákærður fyrir ólöglega vörslu vopnanna og krefst ákæruvaldið þess að þau verði gerð upptæk ásamt útdraganlegu kylfunni sem sögð er hafa verið notuð við árásina.
Ilmvötnum og matarvíni stolið
Önnur ákæra varðar þjófnaði úr tveimur verslunum á Akureyri í mars 2025. Maðurinn er sakaður um að hafa stolið tveimur ilmvatnsglösum úr Lyfjum og heilsu á Glerártorgi, að verðmæti rúmlega 40 þúsund krónur.
Þremur dögum síðar er hann sagður hafa stolið fimm ilmvatnsglösum, fjórum matarvínsflöskum og hleðslusnúru úr Hagkaupum. Heildarverðmæti þýfisins í báðum verslunum nemur tæplega 152 þúsund krónum.
Þá er maðurinn ákærður fyrir vörslu 0,26 gramma af kannabisefni í mars 2025 og fyrir að hafa verið með hníf á sér þegar hann kom á lögreglustöðina á Akureyri í júní síðastliðnum.
Athugasemdir