Björn Leví Gunnarsson, fyrrverandi þingmaður Pírata, tekur undir að fyrirspurnir Guðlaugs Þórs Þórðarsonar til ráðherra séu málefnalegar en gerir athugasemdir við samanburð Sjálfstæðismanna við Pírata. Hann segir Sjálfstæðismenn áður hafa kvartað sáran undan fyrirspurnum Pírata og því að þurfa að svara þeim.
Tilefni ummæla Björns er frétt Vísis um að Guðlaugur Þór hafi sent ríflega 300 fyrirspurnir á Alþingi. Í fréttinni er haft eftir Sigurjóni Þórðarsyni, þingmanni Flokks fólksins, að Sjálfstæðismenn séu orðnir „hinir nýju Píratar“.
Björn Leví segist þó ekki sjá neitt athugavert við fyrirspurnir Guðlaugs Þórs.
„Af lauslegum yfirlestri þá eru þetta bara nokkuð málefnalegar spurningar fyrir stjórnarandstöðuþingmann,“ skrifar hann á Facebook.
Hann tekur fram að hann sé „nákvæmlega enginn stuðningsmaður GÞÞ“ og myndi ekki ráða hann í starf ef hann hefði eitthvað um það að segja. Það breyti þó ekki mati hans á fyrirspurnunum.
Björn Leví segist ekki ætla að gefa Sigurjóni það upp að hann hafi ætlað að nota samanburðinn við Pírata sem niðrandi ummæli. Hann telur þó líklegt að Sjálfstæðismenn vilji ekki láta líkja sér við Pírata, enda hafi þeir áður gagnrýnt fyrirspurnafjölda flokksins harðlega.
„Sérstaklega í fyrirspurnaflokknum þar sem þeir vældu eins og enginn væri morgundagurinn yfir því að þurfa að svara spurningum,“ skrifar Björn.
Hann beinir jafnframt spjótum sínum að Flokki fólksins og spyr hvort þar sé nú farið að kvarta undan fyrirspurnum með sama hætti. „Flokkur fólksins orðnir hinir nýju Sjálfstæðismenn – ha?“ spyr hann og segist ætla að launa „þennan aumingjaskap frá Sigurjóni bara á hans eigin nótum“.
Segir fyrirspurnir Pírata hafa haft annað tilefni
Í athugasemd við eigin færslu vitnar Björn Leví í orð Guðlaugs Þórs þar sem hann svarar samlíkingunni við Pírata.
„Nei, ef þú menn skoða fyrirspurnir Pírata þá var það með allt öðrum hætti. Og sumt af því var þannig að þú hefðir gúgglað það sem spurt var út í. Ég er ekkert í því.“
Björn Leví bendir síðan á að hann hafi eflaust átt við fyrirspurnir sem meðal annars vörðuðu heiti tiltekinna sveitarfélaga. Hann segir hana hafa verið lagða fram vegna þess að röng nöfn hefðu verið skráð á fæðingarvottorð í viðkomandi sveitarfélögum.
Tilgangurinn hafi verið að kanna hvort sérstakt regluverk lægi að baki skráningunni eða hvort skráningaraðilar hefðu einfaldlega ekki vitað rétt heiti sveitarfélaganna.
„Ég vissi nafn sveitarfélagsins og sá því að skráningin var röng. GÞÞ var í stjórn sem virtist ekki vita nöfn sveitarfélaganna,“ skrifar Björn.
Í kjölfarið segir hann: „Gætum við vinsamlegast fengið betri þingmenn takk? Þetta eru gersamlega vanhæfir einstaklingar allavega.“
„Tilgangurinn var aldrei að setja sand í tannhjólin“
Viktor Orri Valgarðsson, fyrrverandi varaþingmaður Pírata, segir óþarft að tala um aumingjaskap í þessu samhengi. Honum finnist samanburðurinn skemmtilegur og eðlilegur og gott sé að benda á hann.
Björn Leví svarar því með því að vísa til ummæla sem fram koma í frétt Vísis um að Guðlaugur Þór reyni að „setja sand í tannhjólin“ og segir það aldrei hafa verið tilganginn með fyrirspurnum Pírata.
„Tilgangurinn var aldrei að setja sand í tannhjólin. Samanburðurinn er ekki á jákvæðum forsendum,“ skrifar hann, en ítrekar jafnframt að fyrirspurnir Guðlaugs Þórs séu eðlilegar miðað við stöðu hans sem stjórnarandstöðuþingmanns í fjárlaganefnd.
„Ágætar spurningar bara,“ bætir hann við.
Gagnrýnir þá sem kalla Pírata kverúlanta
Fjölmiðlamaðurinn Egill Helgason tekur einnig þátt í umræðunni og segist telja að fyrirspurnir Pírata hafi skaðað flokkinn. Fólk hafi fengið á tilfinninguna að þingmenn hans væru „kverúlantar“.
Björn Leví segir það dæmi um fordæmingu án þess að innihald fyrirspurnanna sé skoðað.
„Klassísk fordæming án þess að skoða innihald. Enginn, nákvæmlega enginn hefur getað bent á eina ómálefnalega fyrirspurn þegar gengið er á slíka ásökun um að vera "kverúlantar",“ skrifar hann.
Hann segir umræðuna einkennast af því að gagnrýnin beinist að þeim sem spyrji spurninganna í stað þess að beina henni að þeim sem beri ábyrgð á svörum stjórnvalda.
„Það er alltaf verið að skjóta sendiboðana hérna. Gersamlega óþolandi. Stjórnvöldum leyft að komast upp með endalaust þvaður með því að kenna fyrirspyrjendum um í staðinn fyrir þeim sem voru að þvaðra,“ skrifar Björn.
Hann lýkur svarinu til Egils á því að segja tilfinningar vera eitt stærsta vandamálið í stjórnmálum samtímans.
„Þessar blessuðu tilfinningar eru risastóra vandamálið í pólitík í dag. Fólk lætur spila á tilfinningar sínar í allar áttir og þar eru stjórnmálamenn að stjórna tónlistinni.“
Athugasemdir