Hjón í Flórída í Bandaríkjunum telja sig hafa upplifað kraftaverk eftir að eldingu laust niður í þau á kvöldgöngu fyrr í þessum mánuði. Þau slösuðust alvarlega en hafa náð ótrúlegum bata.
Aaron Walenga og eiginkona hans Clare höfðu skilið þrjú börn sín eftir á æskulýðssamkomu í kirkju 2. september og ákveðið að nýta kvöldið saman. Eftir kvöldverð fóru þau í göngutúr og leiddust eftir gönguleið þegar óveður skall skyndilega á.
Eldingu laust niður í hjónin án fyrirvara. Aaron sagðist fyrst hafa talið að bifreið hefði ekið á þau. Hann lá ringlaður og gat vart hreyft sig eða talað. Clare missti meðvitund og hætti að anda um tíma.
Fjórir vegfarendur komu þeim þegar til aðstoðar, hringdu í neyðarlínuna og hófu endurlífgun á Clare. Að sögn hjónanna var hún orðin blá og andaði ekki í þrjár til fjórar mínútur áður en hjálp barst.
Aaron hlaut meðal annars beinbrot í kringum augun, nefbrot, tannskemmdir, skurði í andliti og brunasár á höndum og úlnliðum. Hjónin greindust bæði með heilablæðingar og Clare varð einnig fyrir hjartaskaða.
Þau segja lækna hafa komist að því tveimur dögum síðar að heilablæðingarnar væru horfnar og hjarta Clare hefði náð sér. Clare, sem glímdi tímabundið við minnistap, endurheimti einnig minnið.
Hjónin þakka skjót viðbrögð vegfarendanna og segja trú sína hafa hjálpað þeim í gegnum lífsreynsluna. Þau hafa síðan myndað náin tengsl við fólkið sem kom þeim til bjargar og hyggjast snúa aftur á gönguleiðina á næstu vikum.
