Akureyringur hefur verið ákærður fyrir fíkniefnalagabrot og peningaþvætti en ekki er vitað hvar hann dvelst. Fyrirkall vegna málsins var birt í Lögbirtingablaðinu í dag.
Samkvæmt ákæru lögreglustjórans á Norðurlandi eystra var maðurinn handtekinn á Akureyri 12. júlí 2024. Hann er sakaður um að hafa þá haft í vörslum sínum samtals 2,63 grömm af kókaíni og 173,15 grömm af maríhúana. Fíkniefnin hafi verið ætluð til sölu.
Maðurinn, sem er upphaflega frá Albaníu, er jafnframt ákærður fyrir peningaþvætti. Honum er gefið að sök að hafa um nokkurt skeið fyrir handtökuna aflað sér ávinnings með sölu fíkniefna eða öðrum refsiverðum brotum. Um er að ræða 155.861 krónu.
Ákæruvaldið krefst þess að maðurinn verði dæmdur til refsingar og greiðslu alls sakarkostnaðar.
Málið verður þingfest í Héraðsdómi Norðurlands eystra 28. október næstkomandi.
