Siðanefnd Blaðamannafélags Íslands hefur komist að þeirri niðurstöðu að blaðamaðurinn Ágúst Borgþór Sverrisson blaðamann og DV hafi ekki brotið gegn siðareglum blaðamanna með umfjöllun sem birtist á miðlinum 28. júlí síðastliðinn.

Var úrskurðurinn birtur á heimasíðu félagsins í þessari viku.

Fréttin fjallaði um mann sem hafði óskað eftir aðgangi að lokuðum Facebook hópi þar sem þolendum kynferðisofbeldis er veitt skjól til að deila reynslu sinni. Í umfjöllun DV var jafnframt rifjaður upp dómur sem maðurinn hlaut árið 2014 fyrir kynferðislega áreitni og vörslu barnakláms. Dómurinn var skilorðsbundinn til fimm ára.

Maðurinn kærði umfjöllunina til Siðanefndar 30. júlí og taldi meðal annars að fréttin hefði byggst á einhliða gögnum og að fréttamat DV hefði verið sérstakt. Þá gerði hann athugasemdir við að eldri umfjöllun um dóminn hefði verið dregin fram að nýju.

DV hafnaði því að siðareglur hefðu verið brotnar og taldi málið eiga erindi við almenning. Blaðamaður hefði leitað sjónarmiða mannsins áður en fréttin birtist og haft undir höndum Facebook samskipti hans við umsjónarmann hópsins.

Siðanefnd tók undir þau sjónarmið. Nefndin taldi ekki sýnt fram á að DV hefði hallað réttu máli og komst að þeirri niðurstöðu að Ágúst Borgþór og DV hefðu ekki brotið gegn siðareglum blaðamanna.