Dagný Ósk Vestmann er látin, 38 ára að aldri, eftir baráttu við krabbamein. Hún lést á líknardeild Landspítalans eftir stutta innlögn. Dagný lætur eftir sig eiginmann og tvö börn. Hún vakti mikla athygli fyrir opinskáa og einlæga frásögn af veikindum sínum, þar sem hún notaði reynslu sína til þess að minna fólk á að finna gleðina í litlu hlutunum.
Dagný greindist fyrst með þriðja stigs, illkynja og hormónajákvætt brjóstakrabbamein síðla árs 2017, þá aðeins þrítug að aldri. Meinið hafði þá þegar dreift sér í eitla og nokkrum árum síðar kom í ljós að það hafði dreift sér víðar um líkamann.
Í viðtali við Mannlíf árið 2021 lýsti Dagný þeim mikla hugarhræringi og ótta sem greiningunni fylgdi í upphafi: „Ég fór strax að jarða sjálfa mig í huganum um leið og læknirinn sagði mér að ég væri með krabbamein. Ég var komin með lagalistann fyrir jarðarförina og búin að setja krossinn á leiðið og allt saman.“
Mætti fordómum og „móðursýkisstimplun“
Leið Dagnýjar að greiningu var ekki án hindrana. Hún fann fyrst fyrir stórri kúlu í brjóstinu ágúst 2017 en fékk dræmar undirtektir hjá fyrsta lækninum sem hún leitaði til. Hún sagði lækninn hafa vísað áhyggjum hennar á bug og talið kúluna hormónatengda.
„Ég nennti ekki að díla við þetta viðmót og þessa móðursýkis stimplun,“ sagði Dagný um ákvörðun sína að segja lækninum síðar að kúlan væri farin, til þess eins að losna við viðmótið, en ætlaði sér að leita annað. Þegar lögun brjóstsins breyttist skömmu síðar fékk móðir hennar tíma fyrir hana á Leitarstöðinni. Þann 12. desember 2017 fékk hún loks staðfestingu á því að um alvarlegt mein væri að ræða.
Mikilvægt að finna það fallega í litlu hlutunum
Baráttan reyndist fjölskyldunni þung, bæði andlega og fjárhagslega, og á lokametrunum kom Dagný sjálf að skipulagningu eigin útfarar. Í síðasta viðtali sínu á Vísi, sem birtist tæpum sólarhring áður en hún lést, lagði hún áherslu á ríkt þakklæti gagnvart öllum þeim sem sýnt höfðu fjölskyldunni stuðning.
Hún skildi eftir sig mikilvæg skilaboð til samfélagsins um lífsgildi og mikilvægi þess að hægja á sér:
„Mig langar að minna fólk á að finna það fallega í litlu hlutunum. Lífið getur ekki snúist endalaust um hraða þannig að maður gleymi að njóta þess. Það er svo mikilvægt að staldra aðeins við.“
Fyrir þá sem vilja sýna fjölskyldunni stuðning á þessum erfiðu tímum er opinn söfnunarreikningur á nafni Kristins Bjarka Hjaltasonar, eiginmanns Dagnýjar:
- Kennitala: 160183-5439
- Bankanúmer: 0702-15-835439
