Í Japan, þar sem langir vinnudagar og annasamt líf setur mark sitt á svefnvenjur fólks, kepptu svokallaðir afreksmenn í svefni um að leggjast niður, slaka á og sofna sem hraðast og sofa sem fastast. Keppnin var haldin á vegum dýnufyrirtækis í Tókýó.
Keppnin, sem fékk nafnið Matt Race, fór fram fyrir rúmri viku og tóku tugir þátttakenda þátt. Þeir fengu svefnmælitæki og komu sér fyrir á þægilegum dýnum þar sem þeir máttu sofa í allt að 90 mínútur.
Í verðlaun fyrir efsta sætið voru rúmlega tvær milljónir jena, jafnvirði um 14 þúsund Bandaríkjadala.
„Japan er oft lýst sem landi þar sem fólk þjáist af svefnskorti og hér er fólk mjög samviskusamt,“ sagði Riichiro Nakama, listrænn stjórnandi sem hafði umsjón með skipulagningu keppninnar.
Í dimmu herbergi sváfu þátttakendur með mælitæki fest við höfuðið. Sumir höfðu tekið með sér mjúk tuskudýr sem þeir héldu á meðan þeir sváfu.
„Með því að gera þetta að viðburði af þessu tagi tel ég að við getum fengið fólk til að sofa saman og aukið áhugann á svefni,“ sagði Nakama.
Japanir sofa skemur en aðrar þjóðir OECD
Samkvæmt gögnum Efnahags- og framfarastofnunarinnar (OECD) frá árinu 2021 sváfu Japanir að meðaltali í sjö klukkustundir og 24 mínútur á sólarhring. Það var stysti meðalsvefntími allra aðildarríkja OECD.
Sérfræðingar hafa meðal annars bent á langa vinnudaga, langan ferðatíma til og frá vinnu og líflegt næturlíf sem mögulegar skýringar á svefnskorti Japana.
„Þetta var búið á augabragði. Ég vildi næstum því að ég hefði fengið að sofa aðeins lengur,“ sagði Chisato Honda, 32 ára þátttakandi, í samtali við AFP-fréttastofuna.
„Þetta var skemmtileg keppni,“ bætti Honda við.
Sigurvegarinn var valinn út frá því hversu hratt og vært þátttakendurnir sváfu.
Suimii, sem gaf aðeins upp gælunafn sitt, bar sigur úr býtum og hlaut peningaverðlaunin.
„Mig langar að búa ein, þannig að ég held að ég noti peningana til að greiða flutningskostnaðinn,“ sagði hún.
Hún bætti við að sig langaði einnig í rúm eins og prinsessa ætti og hygðist því kaupa sér slíkt rúm fyrir hluta af verðlaunafénu.
