Breski blaðamaðurinn Secunder Kermani var stöðvaður á Ben Gurion-flugvelli í Ísrael snemma í gær og var í fyrstu meinaður aðgangur að landinu. Hann var kominn til að fjalla um kosningarnar sem framundan eru.

Kermani er margverðlaunaður fréttaritari bresku sjónvarpsstöðvarinnar Channel 4 News í erlendum fréttum og hefur fjallað ítarlega um Ísrael, Vesturbakkann og Gaza. Við komuna fékk hann skriflega tilkynningu um að honum yrði ekki hleypt inn í landið.

Nokkrum klukkustundum síðar var honum þó veitt heimild til að koma inn í landið, eftir að Channel 4 hafði haft samband við ísraelska stjórnarerindreka.

Kermani sagði að landamærayfirvöld hefðu spurt hann hvort hann teldi Ísrael fremja þjóðarmorð á Gaza og hvort hann liti á Hamas og Hezbollah sem hryðjuverkasamtök.

„Er þetta ný stefna stjórnvalda, að hleypa aðeins ákveðnum blaðamönnum inn í landið? Jafnvel þótt þeir starfi hjá rótgrónum fréttamiðlum?“ skrifaði hann í WhatsApp-hóp sem erlendir blaðamenn og ísraelskir embættismenn eru í.

Eftir að hafa dvalið um stund í varðhaldi á flugvellinum var ákvörðuninni snúið við og Kermani leyft að fara inn í Ísrael. Síðar skrifaði hann á samfélagsmiðilinn X að hann hefði áhyggjur af því að aðrir blaðamenn, sem reynt hefðu að komast til landsins undanfarnar vikur, hefðu lent í svipuðum aðstæðum.

Árið 2024 hlaut Kermani bæði Emmy-verðlaun og BAFTA-verðlaun fyrir heimildarmynd Channel 4, Inside Gaza: Israel and Hamas at War, sem fjallaði um upphaf þjóðarmorðsins á Gaza eftir árás Hamas 7. október.

Samtök erlendra blaðamanna sögðust í gær vita af fleiri tilvikum á síðasta ári þar sem blaðamönnum hefði verið snúið frá við landamæri eða aðgangsleyfi þeirra afturkölluð.