Flosi Kristinsson, bóndi á Höfða í Grýtubakkahreppi, lést á hjúkrunarheimilinu Grenilundi á Grenivík 24. september síðastliðinn.
Akureyri.net greinir frá andláti hans.
Flosi fæddist í Hringsdal á Látraströnd 10. mars 1929. Fjölskyldan flutti að Höfða árið 1932 og vann Flosi við landbúnaðarstörf frá unga aldri. Hann starfaði einnig við vegagerð og stundaði sjómennsku um nokkurra ára skeið.
Árið 1950 keypti Flosi Höfðajörðina ásamt bræðrum sínum, Ásmundi og Kristmanni, en hóf sjálfur búskap þar árið 1955. Hann stundaði búskap á Höfða alla tíð, ræktaði jörðina og byggði upp húsakost hennar. Þar voru meðal annars sauðfjárbúskapur, æðarvarp og kartöflurækt.
Eftirlifandi eiginkona Flosa er Þórdís Guðrún Þórhallsdóttir. Þau eignuðust tvær dætur, Ástu Fönn og Ingu Hrönn.
