Sigurður Hafstein, fyrrverandi bankastjóri, lést á hjartadeild Landspítalans 24. september, 85 ára að aldri.

Morgunblaðið greindi frá andláti hans.

Sigurður fæddist 11. október 1940. Hann lauk lögfræðiprófi frá Háskóla Íslands árið 1967 og framhaldsnámi við Stokkhólmsháskóla tveimur árum síðar. Hann starfaði fyrst sem lögmaður og öðlaðist réttindi hæstaréttarlögmanns árið 1974.

Sigurður tók virkan þátt í félags- og stjórnmálastarfi og var meðal annars framkvæmdastjóri Sjálfstæðisflokksins á árunum 1972 til 1980.

Árið 1980 hóf hann störf fyrir Samband íslenskra sparisjóða og gegndi síðar starfi bankastjóra Sparisjóðabanka Íslands frá 1993 til ársbyrjunar 2002.

Sigurður kvæntist Andreu Elísabetu Sigurðardóttur kennara árið 1972. Þau eignuðust þrjú börn, Ásgerði, Hannes og Ragnhildi. Andrea lést í júní árið 2025.