Kvikmyndagerðarmaðurinn og leikarinn Mel Brooks, sem er 100 ára, var staðráðinn í að snúa aftur í hlutverk sitt í væntanlegri framhaldsmynd gamanmyndarinnar Spaceballs. Hann gekk svo langt að fara fram á að atriði hans yrðu tekin upp áður en tökur á myndinni hæfust formlega.
Leikkonan Daphne Zuniga, sem starfar með Brooks að nýju myndinni, greindi frá því að atriði hans hefðu verið tekin upp áður en tökur á myndinni hófust.
„Við tókum upp Spaceballs: The New One, sem Mel Brooks vann að með handritshöfundunum. Hann hefur mikil áhrif á myndina. Hann er þegar búinn að taka upp sinn hluta, áður en við hófum tökur,“ sagði Zuniga á pallborðsumræðum á 90s Con-ráðstefnunni á sunnudag, samkvæmt tímaritinu People.
„Þetta var hans hugmynd: „Þið verðið að taka mig upp núna, því ég er orðinn 100 ára.“ Þannig að við gerðum það,“ sagði hún.
Spaceballs: The New One er framhald vísindaskopstælingarinnar Spaceballs, sem kom út árið 1987. Brooks skrifaði og leikstýrði fyrri myndinni og mun nú snúa aftur í hlutverk geimverunnar Yogurt, sem er skopskæling af Yoda úr Star Wars.
Zuniga mun einnig endurtaka hlutverk sitt sem Vespa prinsessa. Á pallborðsumræðunum upplýsti hún að stefnt væri að því að frumsýna framhaldsmyndina 23. apríl 2027.
Josh Greenbaum leikstýrir myndinni og meðal nýrra leikara eru Keke Palmer, Josh Gad og Lewis Pullman.
Josh Gad hrósar orku Brooks
Ýmislegt bendir til þess að biðin eftir Spaceballs: The New One verði þess virði, en töluverður tími er liðinn frá því að verkefnið fór fyrst af stað.
Josh Gad, sem skrifar handritið að myndinni ásamt öðrum og er einnig einn framleiðenda hennar, hrósaði Brooks fyrir áhugann og kraftinn sem hann sýndi við gerð framhaldsmyndarinnar þegar Gad kom fram í hlaðvarpi árið 2024.
„Það hefur verið ótrúlega gaman að sjá hann enn í fullu fjöri á öllum sviðum,“ sagði Gad í samtali við Kelly Ripa í hlaðvarpi hennar á SiriusXM, samkvæmt People.
„Hann er svo ótrúlega fyndinn án þess að þurfa að hafa fyrir því og svo ótrúlega snjall,“ bætti Gad við um Brooks.
Brooks myndi líklega taka undir þau orð.
Í viðtali við breska dagblaðið The Times í september 2025 sagði leikarinn að suma daga tæki hann varla eftir því að hann væri ekki lengur 37 ára.
„Ég tala í síma og skrifa á hverjum einasta degi. Ég er alltaf að skrifa, alltaf að leiðrétta og alltaf að spyrja spurninga,“ sagði hann.
