Nokkuð var um verkefni hjá lögreglunni á höfuðborgarsvæðinu í gærkvöldi og nótt. Meðal annars voru þrír ökumenn handteknir vegna gruns um akstur undir áhrifum og tveir einstaklingar voru teknir í stolinni bifreið.

Lögregla stöðvaði erlendan ríkisborgara við akstur en maðurinn var ekki með nein skilríki og gat ekki gert grein fyrir hver hann væri. Hann er jafnframt grunaður um sölu og dreifingu fíkniefna og var vistaður í fangaklefa á meðan málið er rannsakað.

Tveir einstaklingar voru einnig handteknir eftir að lögregla stöðvaði bifreið sem hafði verið tilkynnt stolin. Báðir voru vistaðir í fangaklefa vegna rannsóknar málsins. Ökumaður bifreiðarinnar er auk þess grunaður um akstur undir áhrifum fíkniefna.

Þá voru nokkur mál vegna gruns um akstur undir áhrifum. Einn ökumaður var handtekinn grunaður um ölvunarakstur og tveir vegna gruns um akstur undir áhrifum fíkniefna. Þeir voru látnir lausir að lokinni blóðsýnatöku.

Lögregla og sjúkralið voru jafnframt kölluð út vegna slyss á rafhlaupahjóli. Tveir einstaklingar voru saman á hjólinu, sem er bannað, þegar þeir féllu og slösuðust. Þeir voru fluttir á bráðamóttöku til frekari aðhlynningar.

Að lokum var lögreglu tilkynnt um þjófnað í matvöruverslun. Lögreglumenn fóru á vettvang og er málið til rannsóknar.