Íslenskur karlmaður á þrítugsaldri hefur verið dæmdur í 60 daga skilorðsbundið fangelsi fyrir að hafa haft í vörslum sínum rúmlega 100 ljósmyndir og myndbönd sem sýndu börn á kynferðislegan og klámfenginn hátt.

Málið var tekið fyrir í Héraðsdómi Reykjavíkur. Maðurinn var ákærður af lögreglustjóranum á höfuðborgarsvæðinu í maí vegna myndefnis sem fannst í iPhone-farsíma hans.

Samkvæmt ákæru hafði maðurinn alls 91 ljósmynd og tíu myndbönd í vörslum sínum á þáverandi heimili sínu í október 2024. Lögregla lagði hald á símann við húsleit.

Maðurinn játaði brot sín skýlaust, bæði við rannsókn málsins og fyrir dómi. Í niðurstöðu dómsins kemur fram að hann hafi ekki áður verið fundinn sekur um refsiverðan verknað.

Við ákvörðun refsingar var meðal annars horft til játningar mannsins og hreins sakavottorðs. Á móti var litið til þess að um væri að ræða rúmlega 100 ljósmyndir og myndbönd af börnum og að hluti myndefnisins væri mjög grófur.

Maðurinn var dæmdur í 60 daga fangelsi en fullnustu refsingarinnar frestað í tvö ár, haldi hann almennt skilorð.

Þá var farsími hans gerður upptækur. Honum var jafnframt gert að greiða 530.100 krónur í þóknun skipaðs verjanda síns.