Ragnar Bjarnason, innkirtlalæknir barna, efast um að þeir sem gagnrýna þjónustu við trans börn og ungmenni hafi ávallt hagsmuni barnanna að leiðarljósi. Þetta kom fram í hlaðvarpinu Meiningu á Rás 1 þar sem fjallað var um stöðu hinsegin fólks og starfsemi trans teymis barna og ungmenna.
Ragnar segir reynslu sína af börnum sem glíma við vanlíðan vegna kynvitundar hafa sýnt honum mikilvægi þjónustunnar.
„Ég á bágt með að sjá hvernig það er að vernda hagsmuni þeirra með því að neita þeim um þjónustu sem lætur þeim líða betur,“ segir Ragnar.
Björn Hjálmarsson barnageðlæknir segir ranghugmyndir og fordóma gagnvart trans börnum meðal annars eiga rætur að rekja til þekkingarskorts. Hann segir trans fólk alltaf hafa verið til en aukin réttindi og sýnileiki hafi gert fleirum kleift að tjá kynvitund sína.
„Á skáldlega vísu þá finnst mér eins og trans börnin séu eins og lítil falleg blóm sem eru að opna sig í moldviðri sem er verið að þyrla upp með rangfærslum og vitleysu,“ segir Björn en þeir Ragnar eru báðir læknar í trans teymi barna og unglinga á Landspítalanum
Læknarnir leggja áherslu á að börn undir átján ára aldri fari ekki í kynleiðréttingaraðgerðir hér á landi. Krosshormónar séu í fyrsta lagi gefnir eftir sextán ára aldur og þá að undangengnu ítarlegu mati. Meðal annars sé lagt mat á hvort ungmennið skilji áhrif meðferðarinnar og mögulegar aukaverkanir og geti veitt upplýst samþykki.
Tilvísanir í trans teymi barna náðu hámarki árið 2022 þegar þær voru 60. Í fyrra bárust 57 tilvísanir og 37 hafa borist það sem af er þessu ári.
Björn segir aukinn sýnileika trans barna ekki merki um „faraldur“ heldur endurspegla veruleika sem hafi orðið sýnilegri.
„Alþjóða læknasamfélagið hefur komist að þeirri niðurstöðu að það að vera trans er ekki geðsjúkdómur,“ segir Björn og undirstrikar mikilvægi þess að veita hópnum góða heilbrigðisþjónustu.
