Einbýlishús við Búðartanga 4 í Hrísey hefur verið sett á sölu. Húsið er 129,3 fermetrar að stærð, á tveimur hæðum og er sett á 99,9 milljónir króna. Það var reist árið 2007.

Eignin stendur á suðurhluta eyjarinnar og er sérstaklega bent á staðsetningu hennar og útsýni í sölulýsingu. Stór verönd er aftan við húsið og þaðan er víðáttumikið sjávarútsýni. Lóðin er girt og frá henni er hægt að ganga beint niður í fjöru.

Á neðri hæð hússins eru meðal annars forstofa, baðherbergi með sturtu, þvottahús og rúmgott svefnherbergi. Eldhús, stofa og borðstofa eru í opnu rými og í eldhúsinu er ALNO-innrétting. Úr eldhúsinu er gengið út á grillpall en úr stofunni er útgengt á stóra verönd. Þar er einnig nýr hitaveitupottur með sjálfvirkri stýringu.

Á efri hæðinni eru tvö svefnherbergi, baðherbergi með sturtu og mjög rúmgóð stofa sem einnig getur nýst sem svefnrými. Kvistir til austurs og vesturs hleypa birtu inn í rýmið og þaðan er útsýni meðal annars í átt að Grenivík og Dalvík.

Sjávarútsýnið er þó eitt af því sem helst vekur athygli í sölulýsingunni. Úr gluggum efri hæðarinnar má fylgjast með bátum og snekkjum sigla hjá húsinu. Þá kemur sérstaklega fram að hnísur sjáist oft leika sér í sjónum fyrir utan húsið, þannig að verðandi eigendur gætu átt von á að fylgjast með sjávarspendýrunum úr eigin stofu.

„Sjón er sögu ríkari,“ segir að lokum í lýsingu eignarinnar.