Fjöldi ökumanna var stöðvaður vegna gruns um akstur undir áhrifum á höfuðborgarsvæðinu í gærkvöldi og nótt. Þá var einn maður handtekinn eftir líkamsárás og annar ökumaður vistaður í fangageymslu vegna meintra fíkniefna og ólöglegrar dvalar hér á landi.

Í Reykjavík stöðvaði lögregla ökumann vegna gruns um ölvunarakstur. Hann var látinn laus að lokinni blóðsýnatöku. Í Laugardalnum var ökumaður stöðvaður vegna gruns um akstur undir áhrifum fíkniefna.

Þrír ökumenn voru stöðvaðir í Hafnarfirði vegna gruns um akstur undir áhrifum fíkniefna. Tveir þeirra voru látnir lausir að lokinni blóðsýnatöku en sá þriðji var einnig með meint fíkniefni á sér. Við athugun kom jafnframt í ljós að hann var í ólöglegri dvöl á Íslandi og var hann vistaður í fangageymslu lögreglu.

Í Garðabæ var ökumaður stöðvaður vegna gruns um ölvunarakstur og látinn laus að lokinni blóðsýnatöku. Þá var ökumaður í Kópavogi stöðvaður vegna gruns um akstur undir áhrifum fíkniefna.

Lögreglu barst einnig tilkynning um líkamsárás í Breiðholti. Meiðsli voru minniháttar en einn maður, sem var í annarlegu ástandi, var handtekinn og vistaður í fangageymslu.

Tveir ökumenn, báðir í Kópavogi, reyndust sviptir ökuréttindum þegar lögregla hafði afskipti af þeim. Málin voru afgreidd með sektum.

Þá var tilkynnt um umferðarslys í Laugardalnum. Engin slys urðu á fólki og var málið afgreitt á vettvangi.